Girona an kal zel

La Liga hmahruaitu Girona-in an season duhawm hman an chhunzawm zel a, Copa del Rey quarterfinal lut turin Nilaini zan khan Rayo Vallecano chu 3-1 in an hneh - Cristhian Stuani chuan goal hnih khungin Daley Blind chuan goal khat a thawh ve bawk.

Kum 37 mi Stuani hian minute 15-naah goal hmahruai khungin, minute li hnuah penalty hmangin a khung belh - tun season inelna hrang hrangah goal 10 a khungna chiah niin, Blind chuan minute 26-naah a belhchhah.

Vallecano hian minute 36-naah Randy Nteka hmangin si phurh sut ṭhen mah se, goal an chhuah hnem hman hret a, an tho leh tawh lo. Real Sociedad chuan 2-0 in Osasuna an hneh ve bawk - minute 56-naah Osasuna defender Alejandro Catena chuan penalty a chawi bakah red card a hmu a, Mikel Oyarzabal chuan penalty hi goal-ah chantirin, hun pek belhah Mikel Merino chuan a khung leh bawk.

Inelna hrang hrangah match li zet a zawna an chak tawh hnuin Valencia chu Celta Vigo lakah 3-1 a tlawmin, Copa del Rey an mangṭha - mikhual Celta tan Luca de la Torre leh Anastasios Douvikas (penalty) ten goal an khung hnuah, Valencia hian Pepelu-a 'penalty' hmangin si phurh sut ṭhen mah se, minute 80-naah Douvikas chuan a khung ve leh a, 3-1 in Valencia an tlawm.

Nizan khan Unionistas leh Barcelona inkhelin, result kan hre hman lo a, zing dar 2:00 khan Madrid derby-ah Atletico Madrid leh Real Madrid an inkhel bawk.