Madrid khawpuiah Formula 1?

Formula 1 thuneitu lamin an duh dan chuan khawpui tam thei ang berah F1 inelna awm se tih a ni a, hma pawh an la chak hle - season thar aṭang chuan Spain khawpui Madrid-ah pawh an tlan dawn nia sawi a ni.

Tun hmain Madrid-ah hian intlansiak an lo nei tawh ṭhin, kuminah an tlan leh a nih chuan kum 40 chuang hnua an kir lehna hmasa a ni hial ang. Spain ramah hrim hrim chuan Barcelona lamah F1 hi an tlan reng thung.

Barcelona hian Spanish Grand Prix thleng turin inremna kum 2026 thleng daih an nei mek, khawthlang lam chanchinbu miten an ziah dan chuan Madrid pawhin kum 2026 thleng atan inremna an ziak dawn niin an sawi.

Car intlansiakna sang ber F1 season thar hi March thlatir aṭanga tlan ṭan tur a ni a, ruahman dan chuan January thla tawp hian inelna neih dan tur tarlan chian a ni ang.