India an tlawm - beiseina a tlem ta!

AFC Asian Cup 2023-a an match hnihnaah India chuan 3-0 ngawtin Uzbekistan an ngam lo a, match hmasa zawkah Australia chu 2-0 a an lo ngam loh tawh bawk avangin Blue Tigers beiseina a tlem sawt a, round of 16 luh chu anmahni kutah chauh a innghat ta lo.

Australia laka an chak loh zawhah India coach Igor Stimac-a'n, "Kan tournament a inṭan ve ta," a ti a, an tan Australia chu hneh rual ni lo mah se Uzbekistan lakah erawh hnehna chan an beisei thu a sawi.

Mahse, a sawi leh a tak ram chu a dang daih a, inkhel boruak sangah Indian player-te tawnhriat ngah tawk lohna a lang ṭhin a, an chesual leh ṭhin - Uzbekistan-in first half chhungin Abbosbek Fayzullaev, Igor Sergeev leh Sherzod Nasrullaev hmangin goal khat ṭheuh an khung a, Blue Tigers-in a chhanletna tur an nei lo.

Group B Inkhel dangah Australia chuan 1-0 in Syria an hneh a, Jackson Irvine chuan inkhela goal awmchhun a khung. Australia hian match hnih an khelh aṭanga point ruk hmuin, last 16 an lut der a, Uzbekistan dinhmun a ṭha ta viau bawk.

Beiseina neitu

Inkhelh hmain India midfielder Lalengmawia Ralte chuan, "Australia aiin an ṭha lo zawkah kan ngai mai thei. Mahse, an squad en ila, a mimal ang tak pawhin an chhiat bikna a awm loin ka hria," tiin Vanglaini a hrilh a, a sawi dik.

Ahmad bin Ali Stadium, Al Rayyan-a fans 40,000 dawn pungkhawm zingah India ṭantu an tam zawk a, mahni khelmuala inkhel ang mai an ni. Mahse, ṭantu nei mang lo Uzbekistan an zam phah lo a, minute lina lekah goal an khung nghal.

Kum 20 mi CSKA Moscow winger Abbosbek Fayzullaev chuan an hmahruaina goal hi a tauh lut a, Australia laka chesual tawh keeper Gurpreet Singh Sandhu-a'n a hnathawh tur a thawk ṭha tawk lo tiin a sawi theih.

Idnia-in nawr let tum mah se Uzbekistan an hlauhawm chhunzawm a, Greek club Panserraikos midfielder Jaloliddin Masharipov-a'n crossbar a pet perte chuan India thin phu a tirang hle!

An thamral

Uzbekistan hian goal dang hmu turin rei tak pawh an nghak lo. Minute 18-naah Fayzullaev-a ball cross chu Akash Mishra chuan lo dang mah se, post a per a, a per lehlam chu Igor Sergeev chuan hnai set sawt aṭangin goal-ah a chantir - he goal luh chhan pawh Rahul Bheke fimkhur tawk loh vang a ni a, boruak sangah India player-ta an talbuai.

Tlarhmaah kum 20 mi Fayzullaev a hlauhawm chhunzawm a, a chet ranna leh tlan chakna chu India defender-ten an chelh meuh lo. Minute 44-naa a hun ṭha neih, Gurpreet-a dansakte chu a ṭha takzet.

First half hun pek belh minute thumnaah India an chesual nawn - ball cross satliah nia lang chu India defending pherh zarah Sherzod Nasrullaev chuan goal-ah a chantir a, hun tawp thlenga goal dang awm loin Uzbekistan an chak.

Blue Tigers tan Sunil Chhetri leh Naorem Mahesh Singh ten chance nei ve mah se, an hun ṭha neih an chhawr lo a, inkhel pumpui thlirin India-in tichhe hran lo mah se, an fimkhur tawk loh vangin goal thum an chhuah a, inrintawkna an tlachham tih a lang.

Lianzuala a tel lo

Mizo player pathum zingah Lalengmawia Ralte (Apuia) chu India tana inkhel bul ṭan awmchhun a ni a, Australia lakah pawh Indian player khel ṭha tlemte zinga mi Apuia hi Uzbekistan lakah pawh a che chhe lo.

Hetihlai hian a dam phawt chuan bul ṭan ṭhin Lallianzuala chu bench-ah dah a ni a, Mizo forward hi a ṭhal hliam vangin a inlan thei lo. Lianzuala chuan, "Inkhelh hma pawh khan training ka nei thei lo. Inkhel thei mai turah ka inngai a, mahse, ka thei ta lo a ni," tiin Vanglaini a hrilh.

India hian January 23, Thawhlehni tlai dar 5:00-ah Syria nen an match thumna an khel dawn a, Lianzuala chuan, "Match tawp ber hi khelh hram ka duh a, chutiang tur chuan ka inbuatsaih. Pathian zarah ka dam hman hram ka beisei," a ti.

Group tin aṭangin a sang pahnih bakah, pathumna tiṭha zual paliin last 16 an khel dawn - India hian Syria an hneh chuan pathumna tiṭha zual pali zinga tel chance a la awm a, Blue Tigers tan match tawp ber hi a la pawimawh takzet.