Liverpool damdawi in a lun rih

Premier League hmahruaitu Liverpool chuan Pathianni zan dar 10:00 hian league match khel turin Bournemouth an lenchilh dawn a, mahse, hliam vangin Reds hi an la talbuai mek.

Reds player langsar zingah Trent Alexander-Arnold, Andy Robertson leh Dominik Szoboszlai te chu hliam vanga Cherries la hmachhawn thei lo tur an ni a, mahse, coach Jurgen Klopp chuan dam lam an pan mek thu a sawi.

Klopp chuan, "Hliam kan neihten ṭhat lam an pan zel a, mahse, inkhel tur erawhin an la inpeih lo. Trent Alexander-Arnold, Andy Robertson leh Dominik Szoboszlai te pawh an zia chho zel a, mahse, first team training an zawm theih hun tur ka la sawi thei lo.

"Player dang inhliam kan neih tawh loh hram ka beisei," a ti - Reds hian Cherries an hmachhawn zawhah, Nilaini zan hian League Cup semifinal second leg khel turin Fulham an lenchilh dawn a, first leg-ah 2-1 in an chak tawh.

Hetihlai hian Reds-in chanchin lawmawm lo an neih belh a, an thiampuipa Mohamed Salah chu AFCON lamah a inhliam. Klopp chuan, "Salah hliam dinhmun hi chiang takin kan la hre lo a, nizan khan kan inbia a, a hliam hi an en dik mek a, kan hre thuai ang.

"Tun dinhmunah chuan hrehawm a ti a, a inhliam dan tak hi a hrethiam bik lo. Mo hian inkhelh chhunzawm theih loh hi a nei khat khawp mai a, ani meuh a inkhelh theih loh chuan engemaw tak chu a ni ang. Mahse, tun dinhmunah chuan engmah hriat ka nei rih bik lo," a ti - Reds ṭantute tan ngaihthlak a nuam lo mai thei.