Arsenal inlan hun thleng leh ta

Premier League hmahruaitu ni chungin krismas an hmang a, kum thar an chuankai meuh chuan a sang zual pali zingah an tel hram hram - Thlasik boruakin Arsenal a hmet khawng a, khaw vawh vanglai takin an lo kir leh dawn ta.

Zanin dar 6:00 hian Arsenal chuan Crystal Palace an lo mikhual dawn, chawlhkar hnih an chawlh hnua an match khelh leh hmasak tur a ni ang. Mikel Arteta naute tan an chet fuh lo laklawh insiamṭhat theihna tur remchang a ni ang.

Gunners buaina ber nia lang chu goal khung an harsat hi a ni a, coach Arteta-a'n engtiangin nge a chinfel dawn tih chu kan hre thuai ang. Gabriel Jesus nei mah se goal khung a harsat, striker dang Eddie Nketiah hi champion pui tham niin a lang lo bawk.

An match hnuhnung pali thlirkir chuan, ball chang tamin inkhel thunun mah se goal khung an harsat avangin a tawpah an buai ṭhin. Kar hnih inbuatsaihna hun an neihah khan engtiang takin nge an chet tih chu zaninah kan hmu dawn a ni.

Bukayo Saka leh Martin Odegaard te hi player hlauhawm tak ni mah se tun hnaiah chuan mamawh chhanna an ni lo, season hmasa anga an ke hmui tak kha an nei let thei a nih erawh chuan North London club tan khaw dang hawi a ngai lo ang.

Thlasik bazar lai a ni a, khawthlang chanchinbu mite chuan Arsenal hian striker an zawng niin an sawi a, sum tam tak thehchhuah erawh an tum lo. Thuthang ṭhenkhatah chuan loan hmangin Karim Benzema hawh an tum nia sawi pawh a awm - Benzema chungchangah chuan Chelsea thawm a awm bawk.

A tawi zawnga sawi dawn chuan Arsenal hian an buaina chingfel turin goal khung thei an mamawh, an neihsa a ni emaw an lei thar tur pawh ni se, goal khung chi player an mamawh - chumi an nei thei a nih loh chuan Declan Rice hoin EPL nomawi hi hnai takah pawh an en ve phak lo mai ang tih a hlauhawm.

Spanish manager Arteta-a'n a neihsa sa a chhawr thiam a, nikum anga boruak a siam fuh leh a nih erawh chuan beisei an nei sang ve leh thei bawk.