Germany lakah India vanduai

India nula ten FIH Women’s Olympic Qualifiers khelh laiah final luh ngei tumin theihtawp an chhuah a, mahse semifinal-ah Germany an ngam lo. Hun pangngaiah 2-2 a an inhnehtawk hnuin, penalty shootout-ah India hi 4-3 in a vanduai zawkah an ṭang.

Final an luh zawh loh avangin Lalremsiami Hmar telna India hian Paris Olympic khel turin ticket an nei nghal mai lo. Nizan khan Japan nen pathumna an inchuh zui a, an chak chuan Olympic 2024 atan an thling dawn tho - he thuziak i chhiar meuh chuan an dinhmun a chiang hman tawh ang.

Ranchi-ah Ningani zan khan India leh Germany te an inhmachhawn a, India hian Deepika hmangin hma an hruai a, mahse, Germany lamin Charlotte Stapenhorst hmanga an sut bakah hun tawp dawn lamah Stapenhorst-i bawkin a khung belh.

Hamrik hnuhnung ber a rik hmain India chuan Ishika-i hmangin an sut leh hlauh, beisei nei tawh mang lo khan beiseina an nei thar. Penalty hmangin chak tur zawn chhunzawm a ngai.

Penalty khungtu zingah Mizo nula Remsiami pawh a tel a, mahse ram pahnih te 3-3 a an inhnehtawk hnuah India lamin an hlah a, a tum ram an thleng zo ta lo. Germany leh United States ten final an khelh a ngai dawn ta zawk a ni.