Match 100-naah Djokovic a chak
Novak Djokovic chuan Australian Open bika a match 100-na chu nimin tlai khan a khel a, darkar hnih leh minute 28 chhungin Tomas Martin Etcheverry chu 6-3, 6-3, 7-6 (7-2) a hnehin fourth round a inhlangkai a ni.
Kum 36 mi Djokovic hian Grand Slam nomawi 24 a nei tawh, ani aia nei hnem an awm lo. Major title 25-na la turin kawng dik a zawh mek a, a match lehpekah chuan Adrian Mannarino leh Ben Shelton te inkhela chak zawk a hmachhawn leh ang.
Inkhel dangah Jannik Sinner a la chak. Italian tlangval hian Sebastian Baez chu darkar hnih pawh tling loah 6-0, 6-1, 6-3 in a hneh am, harsa vak loin Australian Open 2024 fourth round a inhlangkai.
Kum 22 mi Sinner hian season hmasa khan nomawi pali a chawi a, mipa player chhuak thar zinga hmuhnawm leh Grand Slam title pawh la thei tura beisei zinga mi a ni, a match lehpekah chuan seeded 15-na Karen Khachanov a hmachhawn ang.
Ningani zan khan Daniil Medvedev pawhin Emil Ruusuvuori a hneh, inkhel a zawh meuh chuan Melbourne khawpuiah chuan zing lam dar 3:40 a lo ni hial tawh, player-te tan a hahthlak zual ngeiin a rinawm.
Russian tlangval Medvedev hian world number 53 Ruusuvuori hneh turin darkar li leh minute 23 a mamawh a, inkhel inhnehtawk leh hmuhnawm takah 3-6, 6-7 (1-7), 6-4, 7-6 (7-1), 6-0 in a vannei zawkah a ṭang.
Australian Open final vawi hnih khel tawh Medvedev chuan, "Zep loha sawi chuan, inkhel entu chu ni ila mu turin inah ka haw hman daih tawh ang. Dawhthei taka kan inkhel min en avangin ka lawm," tiin zing lam boruak thlenga an inkhel entute a fak.
An inkhelhna hi Rod Laver Arena a ni a, an inkhelh hma chiaha inkhel Anna Blinkova leh Elena Rybakin te an inkhel rei, deciding set chauh pawh minute 31 an khel, hei vang hian Medvedev te inkhelh hun hi darkar hnih leh minute 46 velin an sawn tlai a ni.
Stefanos Tsitsipas pawhin seeded 12-na Taylor Fritz chu 6-3, 6-0, 6-4 in a hneh. Greek tlangval hi set thumnaah 2-0 in a hniam hman a, a hnuah erawh a tho chhuak leh rang hle - a vawi khat nan Australian Open champion nih a tum zel.