Sacho tan Euro 2024 a beisei theih em?

Manchester United aṭanga loan hmanga Borussia Dortmund-a kir Jadon Sancho a hlim leh tawh a, kum 23 mi English winger hi German club-in fapa tlanbo let leh ang maiin duat takin an kuangkuah.

Dortmund hian zanin dar 8:00 hian FC Cologne an hmachhawn dawn a, Sancho hi bul ṭan thei dinhmunah a ding hial. German club hian Bundesliga season chanve an khel zo chauh a, Champions League khelh tur an neih bawk avangin Sancho tan hming chherna tur a la awm.

Kar liam ta khan Dortmund hian Darmstadt 3-0 a an hneh ṭumin Sancho a inlan a, assist a nei nghal. Kumin Euro C'ship hi Germany-ah khelh a nih dawn bawk avangin a khelh ṭhat phawt chuan Gareth Southgate tan pawh hmun kan a harsa ang.

Chutihrualin tun season Bundesliga nomawi inchuh zingah Dortmund hi an tel pha lo. Hmahruaitu Bayer Leverkusen chuan zanin dar 11:00 hian a sang pali zinga mi RB Leizpig an tlawh dawn a, Xabi Alonso hote tan fiahna hautak a ni dawn.

Champion lai Bayern Munich-in January 21, Pathianni hian Werder Bremen an mikhual dawn a, Thomas Tuchel-a hote tan chetsual a thiang tawh lo. Harry Kane pawhin record a duh a nih chuan goal a khung chhunzawm a ṭul ang.