Madrid derby-ah Atletico an chak

Copa del Rey round of 16-ah nimin zing khan Atlético Madrid chuan 4-2 in Real Madrid an hneh a, hmanni lawka Spanish Super Cup semifinal-a pet chhuaktu team hi Spanish Cup aṭangin an pet chhuak ve leh ta thung.

Atletico hian Samuel Lino leh Alvaro Morata hmangin vawi hnih ngawt hma an hruai a, Real hian Jan Oblak (own goal) leh Joselu hmangin si phurh an sut a, minute 90 chhunga goal dang a luh loh avangin extra time khelh a ni.

Antoine Griezmann leh Rodrigo Riquelme ten extra time-ah goal khat ve ve Atletico tan an khung leh a, 4-2 in an chak - Real tan treble beiseina a tawp zui ta bawk.

Ningani zana Copa del Rey inkhel dangah Barcelona chuan 3-1 in Unionistas an hneh a, Ferran Torres, Jules Kounde leh Alejandro Balde ten goal khat ṭheuh khungin, Unionistas tana Alvaro Gomez goal khungin awmzia a nei phak lo.

Mangṭha Real

Spanish Super Cup final-ah Real-in 4-1 ngawtin Barcelona an sawp a, semifinal-ah Atletico hi 5-3 in an hneh bawk - inring tawk takin Atletico khelmual an lenglut zui a, mahse, hmanni lawka an thawnthu nen chuan a danglam ta.

Mualneitu lam hian minute 39-naah Lino hmangin goal hmahruai an khung a, first half hun pek belhah Atletico keeper Jan Oblak chuan Luka Modric-a freekick chu an lamah tilutin Real si phurh a sutsak a, 1-1 in chawlhlawk an hmang.

Second half-ah Atletico bawkin goal an khung hmasa a, Real striker hlui Morata chuan a season duhawm hman chhunzawmin, minute 57-naah a khung - Atletico-in he goal hi an chakpui mai dawn nia a lan hnuah Joselu chuan minute 82-naah si phurh a sut leh a, 2-2 in minute 90 an hmang zo.

Mahse, extra time-ah Griezmann leh Rodrigo ten khung belhin, 4-2 in Atletico Madrid an chak a, Copa del Rey quarterfinal an lut - Griezmann leh Morata hian tun season-ah Atletico tan goal 18 ve ve an khung ta a, Atletico tlarhma pahnih hi an inkawp fuh rih hle.

Barca an chak

El Clasico-ah an mualpho a, coach Xavi chuan, "Player-ten min ringtawk lo a nih chuan ka chhuak mai ang," tiin a sawi hial - mahse, a hun takah Barcelona an tho a, Copa del Rey quarterfinal an lut.

Mahse, Catalan club hian Spanish third division club lakah goal an chhuah hmasak avangin Xavi-a'n hnathawh tur a la nei tih chiang takin a lang a, uang thei an ni lo - minute 31-naah Gómez chuan Unionistas tan khungin, Barca a barakhaih.

Barcelona hian minute 45-naah Torres hmangin si phurh an sut a, Kunde leh Balde ten khung ve lehin, 3-1 in inkhel a tawp. Xavi-a'n striker chhuanvawr Robert Lewandowski chu bench-ah dahin, a hahdamtir a, a aia lut Marc Guiu chu kum 18 mi niin, tun season-ah match li a khel tawh a, goal hnih a khung.

Catalan club hi Pathianni zan dar 11:00-ah La Liga khel turin an inlan lehnghal dawn a, Real Betis an lenchilh ang. Real Madrid chuan Pathianni zan dar 8:45-ah Almeria an mikhual ang a, Atletico erawh Thawhṭanni zan dar 1:30-ah inlan chauhin, Granada an lenchilh dawn thung a ni.