Ivan Toney a lo kir dawn

Zanin dar 11:00 hian Brentford-in Premier League-ah Nottingham Forest an mikhual dawn a, Premier League inkhel hi Ivan Toney vangin en a châkawm. English striker hi pawisa thapnaa a inhnamhnawih avangin match riat chhung an hrem a, Forest lakah hian Bees tan a inlan thei tawh dawn.

Toney hian Premier League match 68 aṭangin goal 32 a khung a, a rawn kir tur hi Brentford tan phurna tham a tling. Tunah hian Bees hi 16-naah an awm mek a, relegate pawh a hlauhawm hial. Mahse, Toney hi a dam ṭha a, an chelh thei a nih phawt chuan Premier League-a inhamtan a harsa dawn lo.

Toney hian competitve match khel tura a inpuahchahnaah Brentford B team tan a khel a, Southampton Under 23 nen friendly match-ah hattrick a siam. Kar liam ta Inrinni khan Danish club Brondby lakah penalty hmangin a khung a, a penalty pet dan pawh panenka ngat a ni.

Season liam ta khan Toney hian league match 33 aṭangin goal 20 a khung a, goal khung tam lamah pathumna a ni a, Erling Haaland leh Harry Kane te chauh a tluk lo. Bees pawhin an ṭangkaipui tih a chiang a, pakuanaah season an khar.

Mahse, Toney hian chhuah a hreh lo tih a sawi thung. Brentford forward chuan "Club chhuahsan hun ṭha ber hi hriat theih a ni lo. Mahse, club lian tana khelh ka châk tih chu ka chiang. Nomawi beisei team-a khelh hi chu mi tupawhin an châk a, January pawh hi transfer hun ṭha ber a ni thei a ni," tiin chhuah a hreh loh thu a sawi.

Toney thusawi hian striker mamawh Arsenal leh Chelsea te beng a thlen ngei a rinawm a, English striker hi January transfer tingaihnawmtu ni thei a ni. Chutihrualin Brentford manager Thomas Frank chuan, "Player thar, Premier League-a goal 20 khung thei la ang kan ni. Eng team pawhin ani anga theihna sang lakluh chu an lawm ang," tiin player thar la lut ang maia a inngaihthu a sawi a, a thu chu ni se, Bees-ah a chelh tur thu a lo sawi tawh bawk.