Sreenidi tan Lalromawia

Nimin Indian Super Cup inkhelah I League club Sreenidi Deccan chuan ISL club Hyderabad FC chu 4-1 in an sawp a, Hyderabad derby-a Sreenidi tana goal khungtu zingah Lalromawia a tel - I League club hian minute 36 chhungin Ibrahim Sissoko, Eli Sabia Filho, Romawia leh Kean Lewis hmangin goal an khung a, Lalromawia hi player of the match atan thlan a ni.

Hyderabad tan hian Makan Winkle Chothe chuan goal khat a khung ve a, awmzia a nei phak lo. Sreenidi tan hian Lalromawia bakah Lalnuntluanga Bawitlung chuan inkhel bul a ṭan a, R. Lalbiakliana leh R. Lawmnasangzuala te bench aṭangin an lut bawk.

ISL club tan Jeremy Zohminghlua, Mark Zothanpuia, Ramhlunchhunga leh Lalchhanhima Sailo ten inkhel bul an ṭan vek a, Manipur coach Thangboi Singto-a'n player enchhin nan a hmang - team pahnih hian match thum khelh tur an neih an khel zo tawh a, Super Cup an mangṭha.