Khawiah nge Oscar a awm tak?

Brazilian midfielder Oscar-a'n December 2016 khan Chelsea chhuahsanin Chinese Super League club Shanghai Port a zawm a, hetihlai hian Oscar hi kum 25 mi chauh niin football khawvelah hmabak a nei êng hle.

Mahse, football inelna sang zawk Premier League kalsanin sum tamna zawk Chinese Super League a pan. Oscar hian a vanglai chhoah tak China a pan avangin sawi a hlawh a, tun thlengin kir zai a la rel lo.

CSL Golden Age

December 2016-ah Chinese Super League-in an vul vanglai hun an tawng. Europe-a player langsar ni pha Paulinho, Ramires, Ezequiel Lavezzi, Gervinho, Hulk, Burak Yilmaz, Jackson Martinez te chu an kawl vek.

Hemi hnu hian Carlos Tevez, Axel Witsel, Javier Mascherano leh Yannick Carrasco te an lut leh bawk.

Oscar hming a rawn lang a, ani Chelsea-a season ngana a hman chhoh lai tak a ni a, Brazil tan vawi 48 a inlan tawh. Oscar hi kum 25 mi chauh a nih avangin a vanglai hun a inṭan chho mek.

CSL-ah a la awm

Kum sarih hnuah chuan player hming langsarte chuan football an chawlhsan a, a ṭhen Europe-ah an kir bawk. Oscar erawh kum 32 mi niin CSL club Shanghai Port tan a la rinawm zel.

Oscar hian Shanghai Port chu a vawi li nan league title a lakpui a, record ṭha tak a ni. Chutihrualin Brazil tan erawh koh a ni tawh lo a, vawi 48-ah a la tang reng tihna a ni.

Zawhna hlir

Footballer talent nei ṭha bikin eng vangin nge Champions League leh Europe inelna sang kalsana chhungkaw nawmsak zawk nan China a pan.

Chhungkaw tana thutlukna siam a nih avangin Oscar-a thutlukna hmasa pawh hi lo hrethiam ta ila. Engvangin nge kum sarih chuang China-ah a cham? Brazil tana a khelh leh theih nan eng vangin nge Europe-ah a kir loh, tih chu zawhna a awm thei a ni bawk.

Oscar hian theihna sang tak chu a nei tehmeuh mai a, mahse a thutlukna avang hian footballer ṭha anga hriat reng tlak a ni em?

A kal chhoh dan

Oscar hian Brazilian mipui tam zawk hmelhriat a hlawh ṭanna chu kum 2011-a Internacional tana a chet ṭhat vang a ni a, kum 2012-ah Chelsea zawmin Brazil tan kum 2014 thleng bul ṭantu nghet a ni.

Jose Mourinho hnuaiah kum 2015 khan Premier League nomawi a chawi a, mahse Chelsea player dang ang thoin Antonio Conte awm hnuah hmun pawimawh a chang pha lo.

Conte-a'n kum 2016 aṭangin Stamford Bridge-ah thuneihna a rawn nei chho a, Oscar hi sira hnawl zinga a tel avangin club dang a zawng ṭan. Atletico Madrid, Juventus, Inter Milan leh AC Milan te chu Brazilian midfielder dawrtute zinga mi an ni.

Mahse, sawmna a hmuh zinga Chelsea pawm awmchhun chu China aṭanga sawmna a ni. Shanghai SIPG sawmna chu Blues hian an pawm a, kum 2021 khan club hming hi Shanghai Port tiin an thlak.

Thutlukna siam chhan

Shanghai hian Oscar manah hian euro maktaduai 60 an seng a, a hlawh hi chhiah pek zawhah euro maktaduai 24 nia sawi a ni bawk. Khatih hunlai khan a hlawh hi 400% in a pung a, khawvel footballer hlawh tam zingah a tel pha.

China hi sum lamah an mawm a, an sawmna hi a tam tham avangin player tan pawh hnawl a har. Oscar hi Brazilian footballer dangte ang bawkin rethei taka seilian a ni.

A pa hi kum thum mi lek a nih laiin motor chesualah a thi a, a nu Sueli chuan a farnu pahnihte nen a ṭulpui. Sueli hian thawmhnaw zuarin ni tin ei khawp an nei ve hram hram.

Brazilian footballler-te hian an chhungte bakah an ṭhiante an chawm a, an hlawh tam mah se sum chhuahna tur a tam thung. Oscar erawhin hetiang zawng zawng hi a zep lo a, tlang takin a sawi.

Oscar chuan, "Footballer zawng zawngin sum hlawhchhuah a, chhungte puih an duh. China pan tura thutlukna ka siam khan ka career aiin ka chhungte ka ngai pawimawh zawk," tiin a sawi.

A cham zel

China-ah hian Oscar hian sum ṭhahnem tak a hlawh ang a, season hnih thum hnuah Europe-ah a kir leh mai ringtu an tam hle. Mahse, December 2019 khan Oscar hian kum nga chhung atan a contract a pawtsei zawk.

Oscar hian thutlukna a siam fuh hle. Thla khat hnuah China sorkar a rawn inrawlh a, foreign player tan season khata euro maktaduai thum aia tam pek an remti tawh lo. Brazilian midfielder erawhin kum tinin euro maktaduai 24 a la hlawh zel.

Brazil-in an en kan

Oscar hian Sanghai Port hi CSL nomawi vawi hnih a chawipui a, mah se kum sarih chhung hian Asia pawn lam miin a khel hi an hmu ta meuh lo. Hei bakah hian Oscar-a'n Chelsea a chhuahsan hnuah 2014 World Cup-a Brazil tana match tina bul ṭantute chu koh an ni tawh lo hrim hrim.

Brazilian midfielder chuan, "China aṭanga sawmna ka pawm rual khan min en kan dawn tih ka hria a, Brazil aṭanga paih ka ni dawn. Hemi pawm tur hian hun pawh a duh. Ram tana koh ka nih loh apiangin an player kohte ka en a, player ṭhenkhat ai chuan ka ṭha zawk tih ka hria," tiin a a lung a len ve ṭhin thu a sawi.

Tite-a'n kum 2016-2022 chhung Brazil a enkawl khan CSL-a khel player koh a nei a, Paulinho leh Renato Augusto te a ko. Mahse, heng player pahnihte hi chu Tite hnuaiah an khel tawh. Oscar erawh en kan a ni zel.

A la ṭha reng

Oscar chuan, "China-a khelh vang ringawtin en kan ka ni nghal a, hetiang tur a ni lo," tiin a lungawi loh thu a sawi chhuak nghe nghe. Portuguese manager Victor Pereira-a'n Oscar-a dinhmun a hrechiang a, ani hian Shanghai SIPG hi December 2017 leh December 2020 chhung a enkawl.

Victor Pereira chuan, "A chet ṭhat lai chuan inkhel thlak danglam hlawk thei. China-ah chuan theihna nei sang player hi tharuma an beih chang a awm a, chutiang pawh chu thiam takin a hmachhawn thei. A khelhpuiten theihna chin an neih avangin khelhpui thiam a ṭul a, Oscar hi chuan a khelhpuite thlengin inrintawkna a pe thei a ni," tiin a sawi.

Oscar hian China pawn lam aṭangin club ṭhahnem takin an la sawm reng thu a sawi. Brazilian club lian Flamengo chuan Chinese off season laiin kum 2023 khan loan hmanga lak an tum a, mahse Shanghai-in an phal lo. Hemi hma pawh hian Barcelona-in an ngaihven a, mahse a tak ram a thleng lo.

A la let thei

January transfer-ah thilmak a thleng a, a chhuak a nih ngawt loh chuan Oscar hian a contract hi a hman zawh a rinawm. Shanghai Port-ah hian 2024 Chinese season tawp thleng contract a nei a, November 2024-ah a contract a zo dawn.

Oscar chuan, "Ka taksa dinhmun leh ka khelhdan hmang thlir hian Europe club liana khel thei dinhmunah ka la dingin ka hria," tiin a sawi. Tuna a contract a zawh chuan China sorkar dan vanga a hlawh a tam theih tawh dawn loh avangin nakkum January transfer-ah chuan Europe club pawhin an ngaihven thei tawh ang.