Nigeria lakah Ivory Coast an tlawm

Africa Cup of Nations 2023 thlengtu Ivory Coast chuan ngam loh an tawng, anmahni bu zawlah ngei mai Nigeria chuan 1-0 in an hneh - inkhel result avang hian Group A a ngaihnawm zual sawt dawn.

Group A ngaihnawm

Ningani zan inkhelah Ousmane Diomande-a'n Victor Osimhen laka a foul avangin penalty a chawi a, he hun ṭha hi William Troost-Ekong chuan chakna goal khung nan a hmang a, point thum hlu tak an hlawhchhuah theih phah bawk.

Khelmual pawn lama a entu ten Ivory Coast an pui ṭha, an thawm pawh a bengchheng hle - puihna dawng ṭha mah se an hun ṭha an chhawr ṭangkai thei lo a, hun tawp thlenga goal chhuah lo Super Eagles ten fak an phu.

Group A inkhel dangah Equatorial Guinea chuan Guinea-Bissau 4-2 in an hneh, point hmuh zat inangah Nigeria aia goal difference an neih ṭhat avangin hmahruaitu an ni daih, point thum neitu Ivory Coast chu pathumnaah an awm thung.

Nigeria leh Guinea-Bissau te an la intum dawn a, inkhel dangah Ivory Coast leh Equatorial Guinea te an intum thung ang - a sang pahnih an tlang nghal dawn, pathumna chuan group danga pathumna thote point neih dan an ngaihchan a ngai dawn a ni.

Salah a hliam

Vawi hnih goal an chhuah hmasak hnuah Egypt chu Ghana nen 2-2 in an inhnehtawk, inkhel result ai mahin Mohamed Salah inhliam chuan chanchinbu a luah hneh zui a, a chawlh chen tur erawh sawi theih a la ni lo.

Ghana hian Mohammed Kudus hmangin ṭum hnih hma an hruai a, chak turin beiseina pawh an nei sang. Mahse, Egypt lamin Omar Marmoush leh Mostafa Mohamed te hmangin an sut ve ve a, point khatah an lungawi a ngai.

Hun chanve vel an khelh laiin Pharaohs captain Mohamed Salah chu hliam vanga lak chhuah a ngai, a lan dan chuan a malpui a hliam niin a lang. Egypt coach Rui Vitoria chuan, "A dinhmun dik tak ka la hre lo, na tak a nih loh hram kan beisei," a ti.

Salah hi a hliam na a nih chuan Egypt leh Liverpool tan chânna nasa tak a ni ang. Reds tan nomawi hrang hrang chawi tawh mah se an ram tan a la hlawhtling lo a, kum 31 mi a nih ve tawh avangin a hun ṭha hnuhnung a ni chho ve zel tawh.Nigeria lakah Ivory Coast an tlawm