De Rossi hoa inlan tur Roma

Jose Mourinho an ban a, a hmunruak luahtu Daniele De Rossi enawklna hnuaia an match hmasa ber atan AS Roma chu zanin dar 10:30 hian an inlan dawn a, table mawng lama talbuai lai Hellas Verona an mikhual ang.

Roma hian season an hmang ṭha lo, league match vawi 20 aṭangin point 29 chauh an la hmu; Serie A table-ah pakuana an nih avangin an dinhmun a duhawm lo a, danglam theih beiseiin coach an thlak a ni.

Player a nih laia Roma tana theihtawp lo chhuah tawh ṭhintu De Rossi-a'n team khelh dan tihdanglam a tum a, training an neih hmasak hoah chuan tlarhnungah player pathum dahin, 3-4-1-2 formation hmanga khelhtir a tum.

Italian chanchinbu mite chuan Paulo Dybala chu striker pahnih hnungah zalenna zau zawk nen a dah dawn niin an sawi, a hmaah striker palian Romelu Lukaku a awm ang, anni pahnih hi an inkawprem a nih chuan danglamna siam tham an ni.

Pathianni zan hian Juventus chu Lecce khelmualah an lut thung ang. Old Lady hi an chak a nih chuan Serie A hmahruaitu an ni lailawk ang, an chunga awm Inter Milan chuan tun kartawp hian Coppa Italia an khelh a ngai dawn thung a ni.