Andreeva-i mumang a la tawp lo

Chak loh hlauhthawnawm taka a din hnuah Mirra Andreeva a tho chhuak leh a, beisei phak baka ṭhain Australian Open a khel mek - tunah chuan fourth round a inhlangkai ta der mai.

Nimin Court 3, Melbourne Park-a inkhelah Russian tleirawl Andreeva hian Diane Parry chu 1-6, 6-1, 7-6 (10-5) in a hneh, set hnuhnung berah hian 5-1 ngawtin hniam hman mah se tie break a thlen pui a, a khingpuiin match point a hmuh tawh chu a pawtthla.

Kum 16 mi Andreeva chuan, "Thil mak tak a ni tih bak sawi tur ka hre lo," tiin Austrlian Open 2024 a zinkawng a sawi, season hmasa kha chuan tuna inelna a hmachhawn laiah hian junior huangah a la khel a ni.

Inkhel dangah Aryna Sabalenka erawh a chak nuamsa hle. Champion lai Sabalenka hian seeded 28-na Lesia Tsurenko chu 6-0, 6-0 in a sawp a, tun inelna neih laiah game nga chauh la hloh chungin third round a paltlang.

Belarusian nula Sabalenka chuan, "Season hmasa khan Iga Swiatek khan set ṭhenkhat kha 6-0 a lak a nei nual, khatiang ang kha tih ve tumin theihtawp ka chhuah," a ti. Inelna hi chawlhkar khat dang an la khelh dawn avangin thahrui khek theih a pawimawh.

US Open champion lai Coco Gauff pawh a kal zel. American tleirawl hian nimin khan Alycia Parks chu 6-0, 6-2 in a sawp a, a zawna kum hnih nan Australian Open fourth round a lut.