Arsenal an la beidawng lo!

Premier League champion an tum ṭhin a, kawng awlsam erawh a ni lo - Arsenal chuan beiseina nung an la nei tih lantirin Crystal Palace chu 5-0 in an sawp a, team lian dangte ang bawkin champion thei an ni tih an fiah nawn.

Inrinni zan Emirates Stadium-a inkhelah, Gunners tan defender Gabriel-a'n goal hmahruai a khung a, keeper Dean Henderson-a'n anmahni lamah tilutin Leandro Trossard-a'n chak a nemnghet; substitute Gabriel Martinelli-a goal hnih chu Palace an inhrosak khumna a ni tawh.

North London club hian league match vawi 21 aṭangin point 43 an hmu a, a chunga awm Manchester City nen an point inzatin Liverpool lakah point hnihin an hniam - match khatin an khel tam thung a ni.

Laipui a puak

Goal khung an harsat ṭhin avangin an dinhmun a ṭha lo a, an hmahruaina an hloh mai pawh ni loin a sang zual pali zing aṭanga chhuak mai thei dinhmunah an ding hman, an dinhmun hniam ta thut hi striker hriam tak an neih loh vang a ni.

Chawlhkar hnih hnuah EPL an khel ve leh a, an boruak erawh a danglam ta hret. A tir lamah an corner hmuh an chhawr ṭangkai thei hle, defender Gabriel-a'n a tauh luh bakah, a tauh hnuhnung zawk chu Henderson-a'n anmahni goal-ah a tilut.

Mikel Arteta nauten kawng tinrengin inkhel an thunun a, second half-ah counter attack aṭangin mawi takin an vaw let. Gabriel Jesus-a'n lak nuam tawk chauha a ball pek chu Trossard-a'n la fuhin, amah vengtu a bum hnuah tawih zetin a khung.

Gunners hian an la duhtawk mai lo, bench aṭanga lut Martinelli hmangin goal hnih an khung belh. Brazilian forward hian box sir lam aṭangin ama thiam dan pangngai takin goal hnih a khung a, an phu ang ngeiin point thum an hmu.

Striker chu?

Goal nga an khung a, anmahni lamah a lut ve miah lo. Inkhel result chauh en a, khelmual chhunga an chetla lai en lem lo tan chuan striker lei kher a ngai lo tia ngaihdan siam mai theih pawh a ni ang, mahse chutiang ngawt chu a la ni lo.

Premier League goal khung hnem ber Alan Shearer chuan, "Emirates Stadium-a Arsenal inkhel hnuhnung pahnih kha ka en, West Ham leh Liverpool an hmachhawn ṭum kha a ni a, inkhel pahnihah khan chak phu zawk an ni.

"Mahse, khang inkhelah te khan an chak lo, a chhan chu goal khung an harsat a ni satliah lo a, goal khung tura shot ringawt pawh kha an harsat tlat a ni. Ka hmuh dan chuan champion turin striker an mamawh," tiin goal khung tur an la mamawh tih a sawi.

England legend hian Gunners tan Ivan Toney chu mamawh chhanna a nih theih a rin thu a sawi a, mual sir lama an player neih dan chhutin Toney chu Brentford tana a hlauhawm aiin a hlauhawm lehzual thei ngeia a rin thu a sawi bawk.