Alcaraz a kal tluang

Carlos Alcaraz chuan a vawi khat nan Australian Open fourth round a lut, Grand Slam chawlh kar hnihna thleng turin Spanish tlangval hian harsatna lian tham a tawk lem lo - champion lai Novak Djokovic pawh tluang takin a la kal zel.

World number 2 Alcaraz hian Inrinni zan khan Rod Laver Arena-ah Shang Juncheng a hmachhawn a, minute 50 chhung lekin 6-1, 6-1, 1-0 in a hneh. Set hnuhnung ber an khelh laiin a khingpui hi malpui vei lam hliam vangin a khel zui thei lo.

Kum 20 Alcaraz-a hneh tak Chinese rawlthar hi kum 18 mi a ni a, ATP Tour level chinah Alcaraz-a'n amah aia player naupang a hmachhawn vawi khatna a ni hial, match dangah chuan amah aia upa vek a la khelhpui tihna a ni.

Grand Slam vawi hnih champion tawh Alcaraz chuan, "Season hmasa khan hliam vangin Australian Open hi ka khel thei lo a, in lam aṭangin inkhel ka lo en ṭhin. Tunah chuan last 16 hial ka lut ta," a ti. Vawiin tlai lamah Tommy Paul hnehtu Miomir Kecmanovic nen an inhmachhawn leh ang.

Nimin khan Djokovic chuan last 16 a khel thung, world number 1 hian darkar khat leh minute 44 chhung lekin Adrian Mannarino chu 6-0, 6-0, 6-3 a sawpin quarterfinal a invaw kai a, champion turin match thum chak a la hmabak.

Quarterfinal-a Taylor Fritz hmachhawn leh tur Djokovic chuan, "Stadium chhung boruak a sang khawp mai, mipui min ṭantu tam tak zingah pawh min ngaina lotu an awm zel, hetiang kara inkhelh hian hnehna chan ka châk zual ṭhin," a ti.

Inkhel dangah Fritz hian season hmasa finalist Stefanos Tsitsipas chu 7-6 (7-2), 5-7, 6-3, 6-3 in a lo hneh ve thung, a vawi khat nan Australian Open final a lut - an intawn hnuhnung pariatah Djokovic a chak vek a, tun ṭumah pawh hian rinkai zawk a ni leh ang.