United-in City hotu lian an chhuhsak

Manchester United chuan chief executive hna chelh turin Omar Berrada an la lut a, ani hi Manchester City-in hlawhtlinna an channa kawnga meizang hlaptu pawimawh a ni.

Berrarda hian United zawmna pawm turin City Football Group-a a hna chelh chief football operations officer a bansan. He hna a chelh hma hian Manchester City-ah hian club commercial director hna a chelh.

Manchester United chuan, "Manchester United hi nomawi chawi duha tuihal club kan ni tih kan lantir a, tuna kan thutlukna hian khelmual chhunga hlawhtlinna chu kan dah pawimawh ber tih a lantir bawk. Omar kan la lut hi kan hmachhawn tam tak zinga hmasa ber a ni," tiin thuchhuah an siam.

Man United-in thuchhuah an siam hma hian City-in Berrada chungchangah hian thuchhuah an siam hmasa. City chuan, "Chona thar hmachhawn duha club a chhuahsan hi kan pawmpui a, a kalnaa duhsakna chang ngei turin duhsakna kan hlan," an ti.

Man United-ah hian chief excutive hna hi a ruak hrim hrim a, November thlaa chhuak ta Richard Arnold thlakna tur nghet an zawng. Arnold hmun ruak hi club head of legal Patrick Stewart-a'n chelh rih mah se a nghet tura tih a ni lo hrim hrim. United-in an ṭhenawm club City duhlai Berrarda an chhuhsak a, club ṭantute tan lawmna tham a tling ang.