Asian Cup a ngaihnawm - Japan leh South Korea an chak zo lo!
Asia khawmualpuia ram leh ram inelna sang ber, Asian Cup 2023-ah Japan leh South Korea an chak zo lo a, Japan phei chu an tlawm! Samurai Blue hian Iraq chu 2-1 in an ngam lo a, goal khat hi an khung ve hram zawk a ni!
Zirtawpni tlaia inkhelah Iraq hian Ayman Hussein hmangin goal hnih an khung a, Japan tan Liverpool midfielder Wataru Endo chuan hun pek belhah mualpho lutuk tur khuh nan goal khat a khung - hun tawp thlengin goal dang a lut tawh lo.
Inrinni tlai khan Jordan lakah harsatna nei loa chak turin South Korea beisei an ni a, hun pek belha Yazan Al-Arab own goal hmangin Jordan chu 2-2 in an inhnehtawkpui hram.
South Korea hian Son Heung-min a penalty hmangin goal hmahruai an khung a, mahse, Jordan-in Park Yong-Woo (own goal) leh Yazan Al Naimat hmangin an chhanglet - a tawpah Al-Arab-a 'own goal' hmangin an him ta hram chauh zawk a ni!
Japan an chuai
Match hmasa berah harsa takin Vietnam chu 4-2 in an hneh hram a, Japan tlarhnung a phui lo. Iraq nena an inkhel turin ngaihven a hlawh a, mahse, player neih dan enin Japan chunga rinna nghat an tawm zawk - hei erawh football-ah thleng thei lo a awm lo, tih hrilhriata kan awmna mai a ni.
Qatar-a inkhel an ni bawk a, Iraq-in ṭantu an nei ṭha hle. Minute ngana lekah Japan goalkeeper Zion Suzuki-a ball dan per chu Hussein-a ke bulah a tla a, kum 27 mi striker hian harsatna nei loin goal-ah a chantir.
Iraq-in player lian zawk leh tharum ngah zawk an nihna chu Japan dan chah nan hman an tum a, rei tak an tithei. First half hun pek belhah goal an khung belh hial - Ahmed Al-Hajjaj-a cross ṭha tak chu Hussein bawkin hnai set sawtah goal-ah a chantir.
Japan hian si khat chauh an phurh laiin Wataru Endo hmanga si phurh sutna remchang an nei a, an chhawr lo. Hun pek belhah erawh Endo hian a khung ta hram a, mahse, draw result hlawh chhuak turin Japan tan hun a tam tawk tawh lo.
Korea chelhtu Jordan
South Korea tan fapa rangkachak Son Heung-Min chuan minute lina lekah penalty a hlawh chhuak a, video assistant referee hmanga ennawn a nih hnu, minute kuanaah ama penalty hlawhchhuah hi a 'chip' goal - 1-0 a ni a, Asian football ram ropui hi harsatna lutuk tawk loa chak zui mai tura beiseina a sang.
Mahse, Jordan-in chutiang ngawt chu an lo tum bik lo. Minute 37-naah Park Yong-Woo chuan an lamah tilutin, Jordan si phurh a sutsak a, first half hun pek belhah Yazan Al-Naimat chuan an goal hnihna a khung zui!
Jordan-in chawlhlawkah 2-1 in hma an hruai a, Al Thumama Stadium-ah chak an inbeisei hman hial. Mahse, hun pek belhah Jordan centre back Al-Arab a chesual a, an lamah tilutin, South Korea si phurh a sutsak.
Si phurh an sut zawh hnuah South Korea an phur sawt a, mahse, hun pek belh minute kuanaa a chance neih duhawm chu Hong Hyun-seok chuan goal-ah a chantir thei lo. Draw-ah South Korea-in lungawi an zir a, Jordan nen point li ve ve an neih tawh avangin an tlang ngei erawh a rinawm.
Iran an tlang
Zirtawpni zana team langsar inlan zingah Iran an chak thung a, Hong Kong chu 1-0 in an hneh - inkhela goal awmchhun hi midfielder Mehdi Ghayedi-a khung a ni a, match hnih an khelh tawhah chak ve vein round of 16 an lut fel der.
Group D-a Japan chak loh zanah Indonesia chuan hnehna changin, Vietnam chu 1-0 in an hneh a, Asnawi Mangkualam chuan inkhela goal awmchhun hi penalty aṭangin a khung a, round of 16 luh an beiseina chu a chhi nung - Vietnam an tla ta thung.
Kum 2007 hnua a vawi khat nan Malaysia-in Asian Cup khel mah se, a vawi khat nana round of 16 luh an beiseina chu a thamral a, Bahrain chuan hun pek belha Ali Jaafar Madan-a goal hmangin 1-0 in an hneh.
Asian Cup hi vawiinah khelh chhunzawm a ni dawn a, zanin dar 8:30-a tling chiang tawh Qatar leh tlang tura chak mamawh China inkhel hian ngaihven a hlawh ang - dar 8:30-ah vek Tajikistan leh Lebanon an inkhel bawk ang.