Basketball-ah Mizoram an chak lo

6th Edition Khelo India Youth Games 2023-a basetball mipa inelnaah Mizoram chuan nimin khan an match hmasa ber an khel a, Uttar Pradesh lakah 107-53 in an chak lo.

Inelna hi PSG Medical College Indoor Courts, Peelamedu, Coimbatore-ah neih a ni a, Mizoram hi group B-ah Uttar Pradesh, Punjab leh Madyha Pradesh te an awm.

Group khat aṭangin a sang pahnihin semifinal an lut dawn a, Mizoram hian vawiin chawhma dar 10:00 hian Punjab an hmachhawn leh ang. Khelo India basketball inelnaah hian team riat chauh an tel avangin Mizoram tan inelna hmachhawn phak hrim hrim hi chanchin lawmawm a tling.

Mizoram coach Samuel Lalthlamuana (SYS Coach) chuan, "Khelo India kan khel thei tih kan hriat kha December 23 zanah a ni a; Squad submit ngai an tih kha December 27 a ni. Player zawn ngaihna a awm loh bakah under 19-a player ṭha engemaw zatin board exam an hmachhawn fur bawk nen, Mizoram team ṭha ber kan tir thei lo a ni," tiin Vanglaini a hrilh.