Hockey-ah Mizoram chak lo

Khelo India Youth Games 2023 hmeichhe hockey inelnaah Mizoramin an match hmasa berah Madhya Pradesh chu 4-2 in an hneh lo. Mizoram awmna group-ah hian Mahdya Pradesh bakah Tamil Nadu leh Chattisgarh te an awm a, group khat aṭang hian team hnihin semifinal an luh dawn avangin beisei tur a la awm.

Madhya Pradesh lakah hian Mizoram tan Laltlanchhungi leh Lalpeksangi ten goal khat ve ve an khung a, hnehna chanpui thei lo mah se an goal khung hi goal difference-ah a pawimawh thei thung.

Inelna hi Mayor Radhakrishnan Stadium, Chennai-ah neih a ni a, vawiin chawhma dar 8:45 hian inelna thlengtu Tamil Nadu an hmachhawn ang. Tamil Nadu hi match hmasa berah Chattisgarh lakah 7-0 ngawtin an tlawm a, hei vang hian semifinal beiseina chhi nung turin Mizoram tan pawh goal khung tam a ṭul dawn a ni.

Mizoram team hi SYS coach Lalroṭhuami (coach) leh R. Lalnunmawii (manager) ten an hruai a, group match hnuhnung ber hi Chattisgarh nen January 24, Nilaini (8:45 AM) ah an khel leh ang.