Toney-a'n Brentford chakpui nghal

Ivan Toney ball a khawih meuh hmain Nottingham Forest-in goal khung nghal mah se Toney telna Brentford an danglam a, hun a tawp meuh chuan 3-2 in an chak. English forward hi pawisa thapnaa inhnam hnawih vangin thla riat chhung hrem a ni a, a rawn kirna inkhelah hian freekick aṭangin a khung nghal.

Gtech Community Stadium-a inkhelah Danilo leh Chris Wood te hmangin Forest-in goal an khung a, Bees tan Ivan Toney, Ben Mee leh Neal Maupay ten an khung thung.

Brentford hian Toney hi an dah sang tih a lang a, inkhelh an ṭan dawnah stadium light tam zawk an tithim. Wrestling-a Undertaker lut tur ang mai a ni a, khelmualah pawh an beiei ang Toney an hmu bawk.

Toney hian nikum April 29 khan Forest lakah hian goal a khung tawh a, hemi hnu hian hremna tawkin ni 266 a awl hnuah Forest lakah bawk a rawn pet goal.

Tlak hlau pahnih inkhel a nih avnagin inkhel pawh a nung ṭha a, Bees goal bawh a nat theih nan Toney a ṭangkai. Chutihrualin Neal Maupay-a chakna goal khung a class takzet a, Bees 3-1 in an vannei.

Inkhelh bana an sawi zui erawh Toney freekick a ni a, English forward hi a goal khung avanga fak an awm rualin freekick a pet hmaa ball a dah sawn zeuh avanga sawiseltu an awm bawk.

Forest boss Nuno Espirito Santo chuan, "Ball a dah sawn a, VAR a inrawlh a ṭul a ni. Ball a dah sawn avangin wall-in an tih tur an tih loh phah a, VAR chuan ennawn tur a ni," tiin a lungawi lo hle.

Bees manager Thomas Frank chuan, "Dik taka sawi chuan ka hmu lo. Goal-ah pawm a ni tih erawh ka hria. Player fing tak a ni. Dan lo anga thil tih hi a ṭha lo a, mah se goal chhungah a lut," tiin a sawi thung.