Jamshedpur tan Khalid-a'n harhtharna thlen zel

Indian Super League table hnuai lama awm Jamshedpur FC-in harhtharna duhin December thla tawp khan Khalid Jamil an la lut a, I League-a Aizawl FC champion puitu coach hian Jamshedpur tan harhtharna thlenin 2024 Kalinga Super Cup-ah semifinal a thlenpui der tawh.

Jamshedpur hi tun season ISL-ah vawi 12 khelhah vawi hnih chauh an la chak a, Super Cup-ah erawh vawi thumah vawi thum an chak. Men of Steel hian match hmasa pahnihah ISL club NorthEast United leh Kerala Blasters te an hneh hnuin Inrinni khan I League club Shillong Lajong 2-0 in an hneh.

Jamshedpur tan Samthang/BVT tlangval PC Laldinpuia'n tlarhnungah hmun pawimawh a chang a, Shillong lakah hian Sanan Mohammed leh Thongkhosiem Haokip ten goal an khung. Jamshedpur hian semifinal-ah Kolkata derby-a Mohun Bagan hnehtu East Bengal an hmachhawn ang.

Nizan khan Mumbai City leh Chennaiyin FC te an inkhel a, Mumbai tan draw a tawk laiin Chennaiyin hi an chak a nih chuan semifinal an lut dawn. Zaninah semifinal lut tur a hriat kim dawn a, dar 7:30-a Goa leh Odisha te inkhel tur hi a pawimawh takzet.

Mizo tamna Odisha hi an mual Kalinga Stadium-a khel an nih bakah Goa aia goal difference a ṭhat avangin draw a tawk dawn. Chutihrualin match hniha vawi hnih chak thei Goa hian hnehna an chang a nih chuan Odisha beiseina a tawp thei bawk.

Nimin khan inkhel awmze nei tawh loah Punjab FC leh Gokulam Kerala an intawng a, 0-0 in an inhnehtawk. Punjab club tan Daniel Lalhlimpuia'n inkhel bul ṭanin, Brandon VL Remdika chu bench aṭangin a lut thung.