Match hnih chawl tur Salah

Mohamed Salah chu malpui hliam vangin a chawlh rih a ngai dawn a, an ram Egypt tan a inlan thei dawn rih lo. Africa Cup of Nations khelh laiah Egypt chuan zanin dar 1:30 hian Salah tel loin Cape Verde an hmachhawn dawn a ni.

Egypt hian match hnih an khelh tawhah an khingpuite an inhnehtawkpui ve ve, tlang tur erawhin an dinhmun a la ṭha - zaninah an chak a nih phawt chuan midang result nghaihchan tel ngai loin an tlang dawn.

An buaina erawh Salah a ni. Liverpool forward hi a inkhel thei rih lo a, group stage paltlangin last 16 lut pawh ni se la an la chhawr theih a rinawm loh, a hma berah quarterfinal an nghah a ngai dawn, chu pawh sawi chian theih a la ni lo.

Egyptian Football Association chuan thuchhuah siamin, "Mohamed Salah-a hliam endik a ni a, a malpui a hliam avangin AFCON match hmabak pahnih chu a khel thei dawn lo a ni," an ti.

Kum 31 mi Salah hian Egypt tan AFCON final vawi hnih a khel tawh, mahse a vanduai zawkah an ṭang ve ve. Kuminah champion pui ngei tum mah se hliam vangin a buai a, a duhthusam angin inelna a hmang dawn ta lo.

Liverpool tan pawh Salah inhliam hi chanchin duhawm lo a ni. Reds Jurgen Klopp pawhin Salah dinhmun chuan a barakhaih thu a lo sawi tawh, tun hnai season ruk chhung chu hliam vanga inkhelh theih loh match 10 vel bak a nei lo a ni.