Club record siamtu Saints an chak

Premier League table mawngphah luah chunga season hmasaa English top flight league mangṭhatu Southampton-in inelna sang ber khelh an tumruh hle - Inrinni zan khan an mikhualna ramah Swansea City chu 3-1 a hnehin, inelna hrang hrangah match 21 zet chu a zawnin an tlawm ta lo. An club chanchina tlawm nei loa an kal rei ber record a ni.

Saints tan Che Adams leh Will Smallbone ten minute 20 chunga goal khungin, 2-0 in hma an hruai a, Swansea tan Jamie Paterson chuan si phurh sut ṭhen mah se, Saints tan Flynn Downes chuan chakna nemnghehna goal a khung.

Southampton-in hnehna an chan avangin Championship table-ah pahnihnaah an invawrh nghal a, an chungah Leicester City chiah an awm. Chutihrual chuan Saints hi pathumna Ipswich Town nen an point hmuh zat inangin, match khatin an khel tam thung.

Mahse, Ipswich hian zanin dar 1:30-ah hmahruaitu Foxes an lenchilh dawn a, Saints tan pahnihnaa awm chhunzawm zelna chance a sang - Championship-ah hian team 24 awmin, a sang pahnih chu Premier League khel turin an tling ṭhin a, pathumna aṭanga parukna ten playoff kaltlangin hmun ruak pakhat an inchuh leh ṭhin.