Hendo-a'n Ajax a zawm

Liverpool captain hlui Jordan Henderson chuan sum tam takin hlimna a thlen lohzia a pholang - Saudi club Al-Ettifaq chu kum chanve chauh a khel hman tihin a chhuahsan a, Dutch club lar Ajax chu kum hnih leh a chanve khel turin a zawm.

Hendo hian July 2023 khan Liverpool chhuahsanin, amah ang thoa Liverpool captain hlui Steven Gerrard enkawl Al-Ettifaq hi pound maktaduai 12-in a zawm a, kar khatah £700,000 a hlawh nia sawi niin, media ṭhenkhat chuan £350,000 angin an tarlang thung.

A khawi zawk zawk hi dik pawh ni se, football khawvela hlawh tam pawl a ni a, mahse, Hendo hian Saudi hi nuam a tih theih miau loh avangin a chhuahsan. Kum 33 mi Hendo hian Ajax a zawm avangin a hlawh chu nasa takin a tihniam dawn a, kar khatah £85,000 a hlawh ang - bonus nen chuan kar khatah £110,000 a tling thei dawn a, Ajax-a hlawh hnem ber a ni dawn.

Ajax hian tun season-ah beisei an phak lo hle. Hmahruaitu PSV Eindhoven chu point 23-in an phak lo mek a, Ajax boss John van 't Schip chuan, "Midfielder tawnhriat nei ṭha leh hruaitu ṭha ni bawk kan mamawh a ni," a ti a, player inhliam an neih avangin squad-a hmun chang thei nghal tur an zawn avanga Hendo la lut an nih thu a sawi bawk.

Hendo hian kum 2011 khan amah chher liantu Sunderland aṭangin Liverpool chu £20mtd-in a zawm a, captain dinhmun hial chelh chhoin, match 492-ah goal 33 khungin, assist vawi 57 a nei - nomawi pasarih a chawipui a, champion theihnaah chuan a champion pui vek a ni.

Kum 33 mi Hendo chuan, "Al Ettifaq ka chhuahsan hi pawi ka ti. Thutlukna awlsam tak ni lo mah se, kei leh ka chhungte tana ṭha ber ngaihtuah chungin he thutlukna hi ka siam a ni. He club-a hun kan hman chhunga min thlawptu club leh fans chungah lawmthu ka sawi a, duhsakna sang ber ka hlan a ni," a ti.

England international chuan sawi zawmin, "Ajax jersey ka ha tur chu ka nghakhlel tawh takzet a, he hmunah ka tan hmun a awm tih ka hriat khan ka hlim nghal em em a ni," a ti a, Dutch club a zawm thei chu a lawm thu a sawi.