De Rossi hoin Roma an chak

Jose Mourinho thlaktu Daniele De Rossi chuan AS Roma a kaihhruaina match hmasa berah a naute a chakpui. Inrinni zan Serie A inkhelah Roma hian Hellas Verona chu 2-1 a hnehin, point thum hlu tak an hlawh chhuak.

Roma khelmual Stadio Olimpico chhung boruak a nung a, player a nih laia a lo tlangnel tawhna hmun a nih avangin Rossi tan thil thar a ni lem lo. Minute 19-naah striker palian Romelu Lukaku hmangin goal an nei a, chawlhlawk hmain Lorenzo Pellegrini hmangin an khung belh.

Mikhual Verona lamin Michael Folorunsho hmangin goal khat an nei a, a dang erawh an nei chhunzawm lo. Rossi leh a naute tan chak hi chanchin ṭha a ni a, chutihrualin an hneh hi team talbuai lai an nih avangin Roma hi an ṭha nghal sawt tihna erawh a la ni bik lo.

Inrinni zan Serie A inkhel dangah AC Milan chuan Udinese 3-2 in an hneh ve bawk a, inkhelah hian chi inthlairna rawngkai a awm avangin minute 10 chu an chawlh lailawk a ngai hial a ni.

Ruben Loftus-Cheek-a'n goal hmasa ber a khung hnu lawkah Milan goalkeeper Mike Maignan chu chhaih nawmnah a ni a, Maignan hian referee hnenah sawiin khelmual a chhuahsan a, a teammate-te chuan an zui ve bawk - minute 10 hnuah an inkhel chhunzawm leh chauh a ni.

AC Milan chuan thuchhuah siamin, "Kan infiamna chhungah hian chi inthliarnain hmun a chang lo - Mike i lamah kan ṭang tlat a nia," an ti. Football lama an hmelma Inter Milan chuan Milan hi an thlawp tih an lo lantir ve bawk.