Valencia an chak zel

Copa del Rey round of 16 aṭangin petchhuah ni mah se, La Liga lamah erawh Valencia-in an harhtharna chan an chhunzawm zel a, Inrinni zan khan an mikhual Athletic Bilbao chu 1-0 in an hneh - inkhela goal awmchhun hi minute 61-naa Hugo Duro khung a ni.

Rubén Baraja enkawl Valencia hian league match li zet chu a zawnin hnehna an chang ta a, league match an khelh leh hmasak berah Atletico Madrid an lenchilh dawn - fiahna tak tak an tawng chho dawn, tiin a sawi theih.

Season thara European football khelh phak tum Real Sociedad pawhin khualmualah hnehna an chang a, Celta Vigo chu 1-0 in an hneh - Brais Mendez chuan inkhela goal awmchhun a khung.

Nizan lamah Real Madrid leh Barcelona te an inlan a, an result kan hre hman lo. Real hian Almeria mikhualin, Barca hian Real Betis an lenchilh thung - Atletico Madrid chu zanin dar 1:30-ah an inlan dawn a, khualmualah Granada an lenchilh ang.