Mizoram Open champion FC Serchhip Kawnpui

42 Assam Rifles leh Serchhip District Football Association buatsaih Mizoram Open Football Championship 2024-ah FC Serchhip Kawnpui an champion a, Inrinnia final inkhelah P&E Veng FC, Serchhip chu 3-2 in an hneh - team pahnih hi hun pangngaiah 2-2 in an inhnehtawk a, extra time-ah FCS an chak hram.

Serchhip Sports Complex-a final hmuhnawm takah Felix Lalruatsanga chuan FC Serchhip Kawnpui tan first half chhungin goal hnih a khung a, awlsam taka chak tur angin an lang hman. Mahse, P&E lamin ngaihdan dang neiin Lalrohlua leh Lalramchhana hmangin si phurh an sut a, 2-2 in inkhel a tawp.

Minute 90 chhunga chak zawk an awm loh avangin extra time khelh zui a ni a, FC Serchhip Kawnpui tan V. Lalremruata chuan goal khungin, 3-2 in a tawpah FCS an chak - champion hian Rs. 1,50,000 dawngin, pahnihnain Rs. 1,00,000 an dawng thung.

January 16 aṭanga neih ṭan inelnaah hian Mizorama district pali aṭangin team pariatin inelna an hmachhawn a, inelna thlengtu Serchhip bakah Aizawl, Champhai leh Lawngtlai aiawh club-te an inlan a ni.