Number 1 Swiatek a chak lo

Australian Open 2024 khelh laiah, hmeichhe world number 1 leh champion tura rinkai ni bawk Iga Swaitek a chak lo. Polish nula hi tleirawl Linda Noskova lakah 3-6, 6-3, 6-4 a tlawmin third round-ah a zinkawng a tawp.

Czech Republic tleirawl Noskova hi kum 19 mi chauh a la ni a, tawnhriat a la neih tlem zawk bakah a khingpui a ṭhat em avangin rinkai lo zawk a ni. Mahse, inkhel boruak sangah a buai lo a, set hnuhnung berah pawh huaisen taka nawr ngamtu zawk niin a dingchang.

World number 50 Noskova chuan, "Sawi ngaihna pawh ka hre lo, world number 1 nen kan inkhel dawn tih ka hriat khan ka phur hle, a ropui dawn tih pawh ka hria. A chak zawk nih leh phei chu ka lawm dan hi sawi ngaihna ka hre lo," a ti.

Inkhel dangah Coco Gauff leh Aryna Sabalenka te erawh an chak a, quarterfinal an lut. Kum 19 mi Gauff hi Australian Open 2008 hnu lamah a thiam zual pariat zinga inhlangkai thei naupang ber a ni hial.

US Open champion lai Gauff hian Polish player Magdalena Frech-i chu 6-1, 6-2 in a sawp. Champion lai Aryna Sabalenka pawhin Amanda Anisimova chu 6-3, 6-2 a hnehin last 16 a paltlang ve bawk.