Mission Veng an tho chhuak (Series 1-1) Tuikual S-in Dishant an ngam lo

Minute 5 leh second 40 chiah a awm tawh tihin feet ruk leh inches riata sang Dishant V Shah chuan chiang takin a 'dunk' a, Mission Veng Vikings ṭantute ding chunga an aw rawl tawpa an au laiin Tuikual South ṭantute an reh ṭhap. Ningani zan kha Mission Veng hlim zan a ni a, Tuikual South ṭantute erawhin ngui chungin Hawla Indoor Stadium an chhuahsan a, an inhnemna chu 'Game 3 a la awm' tih a ni.

MSL semifinal game 2-ah Vikings tan Gujarat center Di-shant a che ropui a, Lalrina Renthlei-in 'triple double' a nei a, Lalrempuia Vaiphei-in a vanglai hmang ṭha lehin Tuikual South 89-78 in an hneh.

Vawi hnih khelh zawha final lut thei an la awm loh avangin April 7, Ninga-ni zanah Game 3 khelh a ni ang.

Hero = Dishant

Tuikual South tan Van-chuang-puia leh Lalrohlua ten bul an ṭan ṭha a, amaherawhchu Vikings-in Lalrina Renthlei leh Dishant-te an luhtir hnuah Mission Veng an tho chhuak nghal. Gujarat palian hmaah Tuikual South player-ten an mei an khup a, tihsual theih loh tura ngaihah pawh tihsual an thlang - chu chuan an buai zia a tilang.

Mission Veng erawh an hmuhnawm thlawt. Lalrina'n show a host a, a changtupa chu Dilshant a ni. Tawnhriat nei
ṭha Lalrinkima inhliam mah se Lalmuanawma (Om Om-a) leh Vanlalnunpuia Varte (Puipuia) te'n Mission Veng lawmna an siam a, Chanmari Vengin Mizoram basketball an thunun lai ang chiahin Rempuia'n a lut thei em em bawk.

Ball keng rei angin Tui-khuah-tlang tlangval Lalrina sawi ṭhin mah se a hunah a pe chhuak tih a lantir a, Dishant-a'n point 32 zet a nei thei. Defence-ah Lalrina leh Moses Zoremmawia te an thawh hlawk a, Model Veng tlangval Moses khelh dan hi a point score zat aṭanga teh chi a ni lo. MSL1 most defensive player Moses hian offensive-ah a ṭhiante tan a khel a, defensive-ah team tan a khel thung.

Vikings mawina tifamkimtu chu Dishant a ni a, Gujarat center hian court chhung a rap tam lo. A khelh chhunah erawh Vikings an chungnung a, Dishant khelh hun ringawt chhutin third quarter thlenga Mission Veng chungnungna chu 43-12 a ni.

Quarter linaah erawh Tuikual South tlangval Dina a che ropui a, chu ti chung chuan Dishant-a tel hun chhung hian Vikings hi 21-20 in an la chungnung hram. Dishant-a tel chhung bika point dinhmun chu 64-42 a ni a, Mission Veng tan Dishant hi hero tih loh chi rual a ni lo.

'Le Le Le'

Game 1-ah Tuikual South kawng tinrengah an chungnung a, free throw chu an chakna kawngah a pawimawh hle.

Game 2-ah erawh Vikings hian vawi 19 free throw an neihah vawi 13 an lut a, TKS-in vawi 17-ah vawi 9 chiah an lut.

Phengphehlep ṭial mawi lohna chhanah hun pawimawha Dina leh ChP-a te freethrow lut lo chu a ngaih theih a, hei bakah hian ChP-a leh Mafaka ten ho lam taka turn over an siam leh Rohlua 3-point luh tum hlah ngun site chu an chak lohna chhan a ni.

Vikings tan erawh Di-shant-a'n vawi sarihah vawi khat chiah a hlah a, open play-ah a thawhhlawk bawk. Mission Veng ṭan-tute Dishant-a luh dawn apiangin an phur lehzual a, 'le le le' tihin Tuikual South player-te auh zam a tum a, inkhelh chhung zawngin an au hlawhtling vek.

An ṭha ber

Mission Veng coach Reuben Lalchhandama chuan, "Kan tan chuan min ṭantute hi an ṭha ber a, anni tluk an awm chuang lo," tiin anmahni ṭantute a fak. Vikings supporter te hi faktlak an ni a, mipui tam zawk hi Mission Veng ni mah se Tuikhuahtlang, Khatla, Chanmari leh veng hrang hrang chawhpawlh an nih avangin an au thawm pawh a ring hle.

Inkhel thlirin ChD-a chuan, "Kan khelh ṭhat zan a ni a, tute pawh kha an khel ṭha vekin ka hria. Chutihrualin insiamṭhatna tur erawh kan la nei, Dishant-a tel loa inrintawkna kan hloh ṭhin kha chu insiamrem kan mamawh a ni," tiin Vanglaini palai a hrilh.

Tuikual South coach KC Lal-liantluanga chuan, "Kan chak lohna kha chu ho tê chauh a ni. Dishant leh Lalrina-te chiah kha ven an ngai a, tihsual tlem te chauh kan nei. Practice hun
ṭha kan nei dawn a, Game 3-ah Dawnga kan chhawr thei dawn bawk nen kan dinhmun a la
ṭha zawk thoin ka hria," tiin a la inringtawk hle.