El Clasico Barcelona mikhual tur Zinedine Zidane
Zanin zanlai dar 12:00 hian Barcelona chuan La Liga khel turin Real Madrid an lo mikhual dawn a, khawvelin mipui 99,354 zet lenna Nou Camp a thlir rawn dawn. Manager a nih hnua a vawi khat nan Zinedine Zidane-a'n El Clasico a hmachhawn dawn a ni.
Tun season La Liga khelh meka a zawna hnehna chang rei ber Barcelona (12 matches) bakah hneh loh nei loa kal tluang rei ber (23 matches) leh mahni khelmuala chak chiang ber Real Madrid (10-2 Rayo Vallecano) mai ni loin khual muala chak chiang ber (6-0 Espanyol) te inkhel tur hi engti kawng zawng mahin sawi nep theih a ni lo ang.
Nikum November thla khan Real Madrid hian Bernabeu-ah Barca hi an lo mikhual tawh a, Catalan Club hian Luis Suarez goal hnih bakah Neymar leh Andres Iniesta te goal hmangin 4-0 in hnehna an lo va chang tawh. Tun dinhmunah Barca hian point 76 hmuin hmahruaitu an ni a, Real aiin point 10 zetin an sang fal.
Tunlai chanchin
Real Madrid-in Rafael Benitez thlak tura Zidane an lakluh hnuah tunlai hian an khelh ṭhat tluan lai an tawng mek a, Atletico Madrid 1-0 a an hneh loh hnuah inelna hrang hrangah a zawnin match li chhung hnehna changin an kaltluang leh tawh a, an inringtawk hle ang tih a chiang.
Hetihlai hian Luis Enrique naute hi tun season-ah Nou Camp-ah chuan hneh theih loh ang mai an ni a, an match hnuhnung vawi 22 aṭangin ṭum 20 ngawt hnehna an chang thei a, mikhual tan len luh huphurhawmna ber hmuna ngaih a ni mek.
Team pahnihah player langsar tak tak awmkhawm mah se enbik hlawh tur chu Lionel Messi leh Cristiano Ronaldo te an ni ang. Portugal captain hian Barca khelmuala a inkhelh hnuhnung vawi riatah goal kua a khung thei a, Thawhleh zan khan Belgium lakah goal khungin an ram a chak pui nghe nghe.
Barca thiampuipa Messi pawhin an mahni khelmuala a match hnuhnung parukah goal riat ngawt a khung thei a, Thawhlehni zan khan Argentina-in Bolivia 2-0 a an hneh ṭumin goal a khung bawk, ram tan goal 50 a khung tling chiah. Leo hian senior career-ah goal 499 a khungna chiah a ni bawk a, zanin hian goal a khung thei a nih ngat chuan mel lung pawimawh bik a phun dawn a ni.
Zidane-a'n a player pawimawh zingah chhawr theih loh tur a neih loh avangin a duh dan takin team a remkhawm thei dawn. Barca defender Jeremy Mathieu chu hliam vangin a inlan thei dawn lo. Mahse, Sergio Busquets (kut zungṭang), Jordi Alba (ke rek) leh Ivan Rakitic (chawn) te erawh an hliam a dam tawh thung.
Nou Camp-ah Zidane
Kumin January thla tir khan Real Madrid chuan B team coach Zidane chu first-team boss atan an la lut a, a contract rei zawng erawh tarlan a ni lo. Player an nih laiin Zidane leh Barca manager Enrique te hi Clasico-ah an lo inhmachhawn tawh. Manager an nih hnuah erawh tun ṭum hi an vawi khat intawnna tur a nih avangin manager pahnih hian ngaihven an hlawh. Kum 2003 Clasico khan Zidane leh Enrique te hi an lo intibuai tawh a, hemi
ṭum hian Barca midfielder Enrique hmaiah Zidane hian a lo nem sak tawh nghe nghe.
Zidane goal khung zingah chuan 2001/02 Champions League semi-final Barca nen Nou Camp-a an khelh ṭuma a goal khung khan sawi nawn a hlawh a, hemi ṭum hian 2-0 in an chak zui. Final-ah pawh Bayer Leverkusen lakah goal ropui danglam bik khungin champion nomawi an chawi zui bawk.
Enrique hi Real Madrid leh Barcelona tana khel kawp thei player tlem te zinga pakhat a ni. Catalan club tan a khelh hnuah Clasico match 16 khelin vawi riat hnehna a chanpui a, vawi hnih chiak chak loh a nei. Spanish chanchina inkhel ngaihven hlawh berah hian goal nga a lo khung tawh nghe nghe.
Cruyff-a tan
Barcelona captain Andres Iniesta chuan karhmasa Ningania chuap cancer vanga thi Johan Cruyff tan hnehna chan ngei a duh thu a sawi. Cruyff kaihhruaina hnuaiah hian Nou Camp-ah Barca-in 5-0 in Real Madrid an lo sawp tawh a ni. Dutch legend hi Barca player pawimawh a nih ṭhin bakah an manager hlawhtling niin La Liga nomawi vawi li a chawipui a ni.
Spain international Iniesta hian Real Madrid nena an inkhelh tur chu match pawimawh bik ni mah se ngaih pawimawh fal theih bik a nih loh thu leh tun season-a an khelh hmabak zawng zawng chu final anga pawimawh a nih vek tawh thu a sawi bawk.
El Clasico a number zawngin
0 - Barca hian league match-ah point 10 chuanga hmahruaitu ni chungin Real an hmachawnah hnehna an la chang ngai lo. (D1 L2)
1 - Barca hian tun hnaiah Real Madrid an lo mikhual hnuhnung vawi sarih aṭangin ṭum khat chiah chak loh an nei. An tlawm hnuhnung ber chu 2012 April kha niin 2-1 in an chak lo.
3.22 - Team pahnihte vawi 171 an inhmachhawn tawh aṭangin inkhelh apiangin chawh rualin goal thum aia tam a lut ziah. Result kan hmuh ngun ber chu 2-1 niin vawi 18 ve ve hetiang result hi an nei tawh a ni.
4 - Inelna hrang hranga an inhmachhawn ṭuma red card phawrh hnuhnung pali chu Real Madrid player-te hmuh vek a ni.
Enrique vs Zidane
1 - Zanin hi Enrique leh Zidane te manager an nih hnua El Clasico-a an intawn vawi khatna tur a ni.
2 - Zidane-a'n player a nih laiin inelna hrang hrangah Barca lakah goal thum a khung a, heng zinga goal hnih chu Enrique nen an inhmachhawn ṭumin a ni nghe nghe.
5 - Enrique leh Zidane te player an nih laiin vawi nga an intawng a, vawi khat ve ve hnehna changin a bak vawi thum chu an inhnehtawk.
MSN vs BBC
14 - Lionel Messi-a'n Real Madrid hi vawi 19-a hmachhawn tawh aṭangin goal 14 a khung tawh a, Cristiano Ronaldo aiin a letin El Clasico-ah goal a khung hnem zawk.
20 - Messi, Luis Suarez leh Neymar ten Real Madrid laka an goal khung belhkhawm chu 20 a ni a, Gareth Bale, Karim Benzema leh Ronaldo ten Barca laka an goal khung belhkhawm chu 12 a ni.
38 - Tun season La Liga bikah Suarez hian goal 26 khung tawhin assists vawi 12 a nei tawh a, ani aia goal khung tura inrawh hnem an awm lo. Suarez hnuaichiahah hian Ronaldo awmin ani hian goal 28 khung tawhin assists vawi kua a nei tawh.