Tlai dar 4:30-ah Kolkata Derby

I League hmahruaitu nih inchuhna chu vawiin tlai hian Kanchenchunga Stadium, Siliguri-ah East Bengal leh Mo-hun Bagan ten an khel dawn.

Tlai dar 4:30-a Kolkata Der-by hi Ten Action-ah pekchhuah a ni ang a, zan dan 7:00-a Bengaluru FC leh Mumbai FC inkhel tur pawh channel ngaiah tho pekchhuah a ni ang.

Robert Vs Jeje

Mohun Bagan nena East Bengal captain tura ngaih Robert Lalthlamuana chuan, "Aizawl FC laka vanneih taka kan chak avangin champion beiseina kan nei thar a, Mohun Bagan hneh tumin kan khel dawn. Tun hnaiah Bagan hi khel ṭha deuh mah se history en let chuan kan record a ṭha zawk," tiin an zam loh thu a sawi.

Kolkata Derby hi vawi 312 zet khelh a ni tawh a, East Bengal hi vawi 118 chakin Mariners hi vawi 87 an chak a, vawi 107 an inhnehtawk. I League bikah vawi 17 inkhel tawhin Mohun Bagan vawi ruk chakin match sarihah an inhnehtawk a, Mariners record a ṭha hret.

Mizo zinga India captain hmasa ber Jeje Lalpekhlua chuan, "India camp aṭanga kan let chiah khan Aizawl FC an hneh loh dan an sawi nasa a, kan chak loh avangin tunah chuan Bengaluru FC leh East Bengal aṭangin pressure kan nei nasa lehzual. Amaherawhchu kan buai phah ka ring lo," tiin Vanglaini palai a hrilh.

Tun season-a an intum hmasak ṭum khan East Bengal leh Mohun Bagan te hi 1-1 in an inhnehtawk a, hemi ṭum hian Mizo starting eleven-ah an lut lo. Bench aṭangin S. Malsawmtluanga leh Jeje te an lut a, tun ṭumah erawh Mama hi squad-ah dah a ni lo.

A pawimawh

Bagan hian Jeje bakah Sony Norde, Pronay Halder leh Pritam Kotal tel loin Aizawl FC an hneh lo a, tunah chuan an kim tawh. Mizo tlangval leh Haiti winger te hian Aizawl FC tiam loa Bagan match hnuhnung pathuma Mariners goal kua zinga goal ruk an khung.

Hnathial tlangval Jeje chuan goal khung aiin point thum a pawimawh thu a sawi a, East Bengal tan phur thar hluaina tur a awm lo. Amaherawhchu Siliguri hi East Bengal ṭantu tamna a ni a, an home match a nih angin ṭantu ṭha tak a nei ang.

Kolkata club-te hian fly-over chhiatnaa thite sun nan armband dum an hreng ṭheuh ang. Kolkata khaw pawna derby khelh chhan hi security thil vang a ni a, Pathianni zana Cricket World Cup khelh dawn vang a ni deuh ber. West Bengal khawpui pawna derby vawi 58 khelh tawhah East Bengal vawi 22 an chak a, Bagan vawi 16 chakin ṭum 20-ah erawh an inhnehtawk thung.

Red and Gold Brigade hi an chak a nih chuan Mariners hi point hnih chiahin an pha tawh dawn lo. Kolkata derby pawimawh ang chiahin 2014 champion Bengaluru FC tan Mumbai FC nen an inkhel tur hi nomawi chawi an tum a nih chuan a pawimawh bawk ang.

Inrinni Inkhel Tur

4:00 PM East Bengal Vs Mohun Bagan

7:05 PM Bengaluru Vs Mumbai FC