United-in UCL lam an hawi thei ang em?

Manchester United-in Pathianni zan dar 8:30 hian Old Trafford-ah Everton an mikhual dawn a, match hnuhnung bera Manchester Derby-a chak Red Devils-in point thum an hmuh chuan City leh West Ham te nen Champions League hmun ruak an inchuh chho zel ang.

United-in khup hliam vangin Bastian Schweinsteiger an chhawr thei dawn lo a, Ander Herrera leh Ashley Young te squad-ah an rawn kir thung ang. Phil Jones-a dinhmun a chiang lo a, karleh lamah Wayne Rooney-a'n training a zawm tawh dawn.

Everton defender John Stones chu England tana a inlan ṭumin inhliam deuh mah se United hi a hmachhawn theih hmel a, Bryan Oviedo leh Kevin Mirallas te chhawr theihin an awm dawn bawk. Hetihlai hian hrem vangin Gareth Barry erawh a la inlan thei lo ang.

Nikum October thla khan United-in Goodison Park-ah 3-0 in hnehna an chang a, Red Devils keeper hlui Tim Howard-a'n season tharah Colorado Rapids a zawm tawh dawn avangin tun ṭum hi player anga Old Trafford a tlawh hnuhnun ber ṭum a ni thei ang.

Referee hi Andre Marriner a ni dawn a, January 2013 hnuah United hi Marriner-a'n inkhel a kaihhruai chuan hnehna an chang tawh lo. Everton erawh Marriner-a'n referee hna a chelh ṭum match hnuhnung paliah hnehna an chang thung.