Chelsea tana Conte duhtu Lampard

England leh Chelsea midfielder hlui Frank Lampard chuan tun hnaia Chelsea pan tur anga an sawi Italy coach Antonio Conte chu hun harsa aṭanga Blues khaichhuak tura a ṭhat ber a rin thu a sawi chhuak.

Chelsea legend Lampard chuan, "Conte hi chiang taka hriatna ka nei hran lo a, mah se Juventus-a a record erawh a ropui hle. Andrea Pirlo hnenah Conte chungchang ka zawt a, amah fakna thu mai lo chu sawi tur a hre lo," tiin Italy manager chu New York City tana a khelhpui Pirlo-a'n a fak thu a sawi.

Juventus a enkawl laia Serie A nomawi pathum chawitu manager hi fak chhunzawmin Lampard chuan, "Kumina thil thleng ngaih-tuah chuan Chelsea enkawl hi a hautak dawn tih a chiang a, mah se he hna hautak thawk tur hian Conte hi a ṭha tawk a ni," a ti.

Chelsea hian vawiin tlai dar 5:15-ah Aston Villa chu khual-mualah an lenchilh dawn a, hrem vanga Diego Costa a inlan theih dawn loh bakah malpui hliam vangin Eden Hazard dinhmun a chiang lo bawk.