Paul Pogba a chhuak lo ang - agent

Khawvela midfielder hmuh-nawm ber pawl ni mek Paul Pogba chu Paris Saint-Germain, Barcelona, Manchester City leh Chelsea ten an ngaihven hle nia sawi ni mah se agent Mino Raiola chuan a khelh mekna Juventus tan contract thar a ziah a beisei thu a sawi.

France international hian kum 2019 June thleng Turin-a cham turin contract a nei mek a, kum 23 chauha upa la ni chunga a ṭhat zia khawvel mit hmuha a pholan tawh avangin Europe-a club lian tam tak chil a ti put.

A player chungchang sawiin Raiola chuan, "Kum dang nena khai-khin pawhin Paul rilru puthmang hi a la danglam lo. Juve-ah hian a la hlim em em a, contract thar ziak tur pawhin kan inpeih thawkhat tawh," tiin a sawi.

Hetihlai hian Andrea Pirlo pawhin Juve hian Pogba chu an hralh chhuah phal a rin loh thu leh ani la chhuak tur chuan a lo berah euro maktaduai 100 vel tal sen a ngaih a rin thu a lo sawi ve bawk.

Serie A champion lai Juventus hian tun dinhmunah point 70 hmuin league hmahruaitu an ni mek a, pahnihna Napoli aiin point thumin an sang zawk. Zanin dar 12:15 hian Empoli an lo mikhual ang.