Kan mawhphurhna a ni - Ozil

Mesut Ozil chuan tuna an awmna hmun chu an phutawk a nih thu leh Premier League nomawi chawi leh chawi loh thuah chuan anmahni mawhphurhna a nih thu a sawi.

Arsene Wenger-a naute hian kum 2003-04 season hnua a vawi khat nan league title an beisei ve leh mek a, mahse an hmelma leh elpui Tottenham leh Leicester City an tluk lo mek a, match sarih khelh hmabak an la neihah chetsual a thiang tawh lo ang.

Germany international Ozil chuan, "Tun season kan hman tawhna hi thlir kir ila, dinhmun ṭha taka awm tawh hnu khan kan chetsual vangin pathumnaah kan tla thla leh, keimahni mawhphurhna a ni tih kan pawm thiam a ṭul. Foxes leh Suprs te hi an la chesual ve leh ngeiin a rinawm a, chu hun chu kan hman ṭangkai theih ngei pawh ka ring," tiin a sawi.

Arsenal hian hliam vangin tun season chhung an la chhawr loh midfielder Jack Wilshere bakah Tomas Rosicky ten training zawm tawh mah se tun kar tawpah chuan first team-ah an hmel hmuh a la beiseiawm lo a, Aaron Ramsey leh Petr Cech te pawh an dam ṭan tawh bawk.

Gunners hian zanin dar 7:30-ah FA Cup aṭanga pet chhuaktu Watford chu Emirates Stadium-ah an lo mikhual ang.