ICC World Twenty20 India tan Kohli-a chet that a tawk zo lo
Ningani zana India leh West Indies-in semifinal an khelh hmain Windies captain Darren Sammy-a'n, "Mi tam zawkin India hi chak turin an beisei a, Goliatha hmaa naupang Davida ding tur ang maiin min ngai a ni. Mahse, mipuiin an theihnghilh
ṭhin chu Davida khan a vir vawm hmangin hnehna a chang tih hi a ni," a ti a, Davida angin milian Goliatha hmaa chak theih a inbeisei a, Darren Sammy-a
ṭawng sual lo.
Wankhede Stadium, Mum-bai-a inkhelah West Indies hian cricket khawvel an barakhaih a, chak tura rinkai zawk India chu wicket sarihin an hneh. West Indies hian chak turin ball thumah run thum chauh an mamawh tawh tihin six run an vaw chhuak a, Indian bowler-te'n tih theih an nei lo.
Inkhel chu
India-in over 20-ah run 192 siamin wicket pahnih chiah an hloh a, an run siam zat ngaih-tuahin India hi chak tura beisei an ni. India tan ṭum danga khel
ṭha ṭhin lo opener Rohit Shar-ma chuan run 43 a vaw chhuak a, Yuvraj inhliam vanga a vawi khat nana inlan Ajinkya Rahane chuan run 40 a vaw chhuak bawk.
Mualneitu team tana khel
ṭha ber erawh a dan pangngaiin Virat Kohli a ni a, Delhi batsman hian ball 47 a hmachhawnah run 89 vaw chhuakin a tawp thleng a dam a, run 15 siama a tawp thleng dam MS Dhoni chu a inlan chhung rei loteah a khel chhe lo.
West Indies bat hun a thleng a, an innghahna ber Chris Gayle chu run nga chiah a siam hman tiha a out nghal avangin India beiseina a sang hle. Mahse, Gayle tel lo pawhin Windies an zam lo a, Lendl Simmons chuan ball 51 a hmachhawnah run 82 zet vaw chhuakin a tawp thleng a dam a, a khel ṭha takzet.
Windies tan run 52 siamtu Johnson Charles leh run 43 siamtu Andre Russell-te an khel ṭha takzet bawk a, Windies-in over 19.4-ah an target umphain run 196 an siam a, wicket pathum chiah an hloh.
Mi vannei Simmons
World Twenty20 khelh a nih hmain Windies tana run 82 vaw chhuaktu Simmons hi hliam vangin a inhnukdawk. Inelna ṭan a nih hnuah Andre Fletcher a inhliam ve leh avangin a aiawh turin Windies squad a zawm a, a match hmasa berah a khel ṭha nghal hle.
Kum 31-a upa Simmons hi a thiam vanga che ṭha a nih rualin a vanneih vang tih hi phat rual a ni lo a, vawi thum out theihna tur a pumpelh.
Run 18 a siam laiin a ball vuak chu man ni mah se ball vawmtu Ravichandran Ashwin-a overstep vangin pawm a ni lo a, Hardik Pandya-a ball vawmah overstep vang bawkin a out lo.
Simmons hi run 69 a siam laiin Jadeja chuan a ball vuak lo dawng mah se rin pawn lamah a ke a dah avangin out-ah pawm a ni lo a, Simmons-a vanneihna hi India hnawtchhuaktu a ni.
Kohli a pawi
Ṭum dang ang bawkin Virat Kohli a hmuhnawm a, final-a a hmel hmuh loh tur chuan a uiawm hle. Sachin Tendulkar nen meuha khaikhin hlawh phak batsman hian match nga aṭangin run 273 tehmeuh a siam thei a, Super 10 aṭanga inelna hmachhawn ṭan team pariata batsman zingah run siam hnem ber a ni.
Tun inelnaah Kohli hian match thumah half century a siam a, heng match thumahte hian a tawp thleng a dam vek. Windies laka run 89 a siam hma hian Pakistan lakah run 55 siamin Australia lakah run 82 a lo siam tawh bawk.
Eng nge an sawi?
Man of the match Lendl Simmons chuan, "Kan chakna tur chuan run ka siam hnem a ngaih thu hrilh ka ni a, boruak sang tak hnuaiah ṭha takin ka hna ka thawkin ka hria. Kan duh angin bul ṭan lo mah ila kan hun ṭha neih kan bawhpelh lo kha a pawimawh a ni," a ti.
India captain MS Dhoni chuan, "Ka lawm lohna awm-chhun chu no-ball pahnih vanga Simmons kan out tir thei lo kha a ni. Kan theihna zawng zawngin kan khel a, target 193 chu ṭha tak a ni. A tawp thleng mar pata khelh a ngai a, kan tlin lo a ni," tiin chak loh chhuanlam a siam lo.