World Twenty20 final: England vs West Indies

Pathianni zan dar 7:00-ah Eden Gardens, Kolkata-ah World Twenty20 2016 final khelh a ni dawn a, India hnehtu West Indies leh New Zealand hnehtu England an inhmachhawn ang.

World Twenty20-ah vawi hnih champion thei an la awm ngai lo a, Pathianni zanah erawh record thar siamin a awm dawn. Kum 2010 khan England lo champion tawhin kum hnih hnuah West Indies an champion ve leh a, Eden Gardens-a chak zawk zawk hi World Twenty20 chanchina vawi hnih champion thei hmasa ber an ni ang.

Team pahnih hi Group 1-ah awm dunin Super 10-a an match hmasa berah an lo inhmachhawn tawh a, Chris Gayle-a century ropui hmangin West Indies hi wicket rukin an chak.

Windies tan hneh tawh hnu an nih vang ringawta England zuam erawh a tih chi loh ang. West Indies an hneh loh hnuah England an tlawm leh tawh lo a, ropui taka South Africa an hneh bakah hneh loh tawng lo Black Caps sawisa theitu an ni.

India an hmachhawn hmaa Kohli chanchin an zawh ṭumin West Indies captain Darren Sammy-a'n, "Chris Gayle hi inhre tawh ngai reng reng em?" tiin a zawt let a, mah se Windies innghahna batsman hi India hmaah a thamral.

Hei vanga zam tur erawh an ni bik lo. Gayle chet ṭhat loh zanah pawh an che ṭha thei tih West Indies-in India lakah an pholang tawh a, England tan fimkhur a ngai khawp ang.

Team pahnih inanna chu target sang tak um kawngah an buai lo hi a ni - England-in South Africa laka an target run 230 an um pha thei a, West Indies-in India an hmachhawn ṭumin target sang umah an buai lo tih an lantir tawh bawk.

English batsman zingah Joe Root (195), Jason Roy (183), Jos Buttler (155)-te'n run siam hnem an thiam laklawh a, mah se Windies hian wicket riat la tawhtu Andre Russell leh wicket sarih la tawhtu Samuel Badree-te an neih ve tho avangin English batsman-te tan fimkhur loh a thiang lo ang.

England batsman Jason Roy chuan, "Eden Gardens-a fans sing chuang hmaa World Cup final khelh chu han ngaihtuah mah teh u, a ropui dawn a ni," tiin West Indies nena an inhmachhawn tur chu an phur thu a sawi.