MSU Cup champion HBC

Mizo Students' Union buatsaih, college zirlaite football inelna MSU Cup 2016-ah Hrangbana College an champion. Nimina Ramhlun Sports Complex-a final-ah Aizawl North College 1-0 a hnehin Inter College MSU Cup champion nomawi an chawi.

Nimin khan final khelh niin hun pangngaiah goal a lut lo a, extra-time khelh niin HBC tan Lalhmachhuana chuan minute 107-naah penalty aṭangin goal awm chhun a thun a ni. Champion team HBC hian quarterfinal-ah Aizawl West College an lo hneh tawh a, semifinal-ah Pachhunga University College chu hun pangngaia an inhnehtawk pui hnuah penalty shootout hmangin 4-2 in an lo hneh bawk a ni.

MFA Honorary Secretary Lal^-nghinglova Hmar chu final-ah hian khuallian a ni a, thu a sawi bakah lawmman a sem bawk.

MSU Cup hi vawi thum an buatsaihna a ni a, kuminah hian Aizawl khawpui chhung aṭangin college pakua an inel a ni.

MSU Cup Lawmman

Champion: Govt. Hrangbana College Rs. 20,000

Pahnihna: Govt. Aizawl North College Rs. 10,000

Best Player: C Lalruatsanga (ANC) Rs. 1000