Premier League Nomawi beisei Spurs leh Leicester inlan dawn

International break neih zawh a nih hnuah Premier League khelh a ni leh tawh dawn a, zanin dar 10:00 hian pahnihna dinhmun luah mektu Tottenham chuan khualmualah Liverpool an lenchilh ang.

Pathianni zanah Premier League hmahruaitu Leicester an inlan dawn bawk a, season hmasaa relegation battle sualtu club hian Southampton an mikhual dawn.

Match sarih chauh khelh tur awm tawhah Spurs-in Foxes an phak lohna chu point nga chauh a ni a, nomawi chawi inbeisei club pahnih tan chak loh a thiang lo.

Spurs thar

Season hmasaah Tottenham-in pangana nichungin season an khar a, league champion Chelsea an phak lohna chu point 23 lai a ni. Tun season-ah erawh Spurs thawnthu a danglam tawh a, league nomawi chawi tur inum vanglai taka Liverpool an hmachhawn tur erawh an tan a pawi thui thei.

Team pahnih hi Premier Lea-gue-a an inhmachhawn hnu-hnung parukah Reds-in vawi nga hnehna an chang a, vawi khat an inhnehtawk. Anfield-ah Spurs hi an tlangnel lo hrim hrim a, Reds khelmuala vawi 21 an lenah vawi khat chiah hnehna an la chan avangin an record duhawm lo hi zaninah thaibo an tum ang.

Spurs tan Jan Vertonghen (khup) leh Erik Lamela (tihrawl)-te chu hliam vangin an inlan thei dawn lo a, Liverpool midfielder Lucas Leiva chu malpui hliam vangin a chawl mek bawk.

Foxes ringtu Alex

Tun season-ah beisei phak bakin Leicester City an khel ropui a, a tir lamah league nomawi em chawi turin beisei ni lo mah se Premier League chawhnu lamah meuh chuan Foxes hi thai bo theih an ni tawh lo.

Pathianni zanah Foxes hian Liverpool laka comeback ropui lantirtu Southampton an mikhual dawn a, Foxes tan a awlsam dawn lo. Hetihlai hian Premier League nomawi chawi tura Foxes ringtu an pung zel a, chung zingah chuan Sir Alex Ferguson-a tel.

Manchester United a enkawl laia league nomawi 13 zet lo chawipui tawhtu Sir Alex Fer-guson chuan, "Leicester hi zawh-buai ngai lovin tun season chhunga team khel ṭha leh hmuhnawm ber pawl an ni a, league nomawi chawi hi an phu a ni," tiin Foxes a fak.

Sir Alex chuan sawi chhun-zawmin, "Leicester hi an chak dawn lo emaw tih hnua 1-0 a chakte an ngah em em a, season tluana vawi riat lai 1-0 a chak chunga league title kan chawi pawh ka la hria a ni," tiin Leicester chuan no-mawi an chawi mai a beisei thu a sawi.