Hamas nen inremna neih kan tum lo : Netanyahu

Israel Prime Minister Benjamin Netanyahu chuan Palestinian firfiak pawl, Hamas-te'n Gaza Strip-a an mi hren mekte an chhuahna tura Israel Defence Force-te an beihpui thlak titawp tura Israel sorkar inremna siampui an tum chu an pawm theih loh thu a sawi.

Hamas hian Israel lakah thil phut hrang hrang ni 90 chhunga tihhlawhtlin tur an ruahman a ni. Heng zingah hian Israel civil mi an hren mekte leh Palestinian helpawl Israel tan ina tang mekte inthleng te, Gaza Strip-a Israel sipai awmte hnuhkir, mipuite zalen taka an vei vah, Israel-in drone hmanga Gaza a thlithlai reng tihtawp bakah Gaza Strip-a bungraw lut a let hniha tihpunte a tel.

Prime Minister Netanyahu chuan, "Tun thleng hian mi tang 110-te chu chhanchhuah an ni tawh a, Israel sorkar chuan mi tang dangte chu an zavaia chhanchhuah a ngai pawimawh hle a, chumi atan chuan sipai chakna a pawimawh a ni" tiin, Hamas-te thil phut chu tihhlawhtlin an tum lo tih a sawi.

Netanyahu hian Hamas-te chuan indona tawp tawh se an duh a, Gaza-ah IDF pawh awm tawh lo a, an pawl kutah Gaza chu a awm leh vek an duh tih sawiin, an thil phut ang hi an remtih chuan Israel sipaite lo beih tawhna chu awmze nei lo a ni dawn a ni tiin, 'Kan khua leh tuite himna kan tiam thei dawn lo a ni," a ti.

PM chuan Pathianni khan Israel ram aṭanga Palestine ram sahthlak a phal loh tur thu chiang takin a sawi nawn leh. Indona chu kalpui chhunzawm zel an tum thu leh, hel pawl chu Gaza chang ni lo Israel chhehvel, Lebanon leh Syria-a mi te pawh an do chhunzawm zel tur thu a sawi a ni.

Hetih lai hian Hamas chuan phek 16-a chhah report an tihchhuahah, October 7-a Israel chhim lam an beih chu Israel-in an ram a luahsak avanga an tih ngei ngei ngai niin an sawi. He report hi Gaza ramri pela Israel an beih hnua public report an tihchhuah hmasa ber niin, English leh Arabic-in a siam a ni.