Mikel-a'n Stoke City a zawm

Championship club Stoke City chuan Premier League-a kir an tumna kawngah thawm an nei nghal a, Chelsea midfielder hlui John Obi Mikel chu kum khat chhung atan an lalut. 

Kum 33 mi Mikel hian March thla khan inhriat thiam tawnnain Turkish club Trabzonspor a chhuahsan a, club nei loa a awm reng hnuah English football khel leh turin Stoke City a 

zawm ta. 

Chelsea tan season 11-a khelh chhunga league match 249 kheltu Mikel hian Premier League nomawi pahnih, FA Cup pathum, League Cup, Champions League leh Europa League nomawi a lo chawi tawh a, a tawnhriat ringawt pawh hi Stoke tan chuan ṭhatpui tham a ni ang. 

Stoke boss Michael O'Neill chuan, "Kan inhmuh hmasak ber aṭangin ka player duhzawng a ni nghal a, a career atana a hmachhawp te min hrilh. Darkar li zet kan titi a, Premier League-a kir a, English top flight-a a career hman zawh a duh thu min hrilh. 

"Stoke City-ah a duhthusam te hi a tih hlawhtlin theih ngei ka beisei," a ti a, Mikel hoa Premier League-a kir a tum. Nigeria captain hlui Mikel hian World Cup vawi hnih a khel tawh a, 2013 Africa Cup of Nations-ah Super Eagles (Nigeria sawina) hi champion puiin nikum nipui lai khan international football a chawlhsan.