Goa-in ISL thleng dawn

India rama football league inelna sang ber Indian Super League chu Goa-in a thleng dawn a, Covid-19 vangin season dang anga home & away-a khelh theih a ni dawn lo. 

ISL lam chuan Goa bakah hian Kerala pawh an thli thlai a, mahse stadium leh training-na hmun nei ṭha zawka ngaih Goa-a inelna nei turin thutlukna siam a ni ta a ni. November - March inkara neih tur inelnaah hian match 95 a awm dawn a, match zawng zawng hi entu awm loa khelh vek a ni dawn thung - ISL hi Covid-19 hnua India rama infiamna liantham huaihawt hmasak ber tur a ni dawn.

ISL enkawltu Football Sports Development Ltd (FSDL) leh inelna neihna tur stadium pathum Nehru Stadium (Fatorda), Tilak Maidan (Vasco) leh GMC Athletic Stadium neitu Sports Authority of Goa chuan inremna hi an ziak tawh a ni. 

Ruahman ang chuan ISL hian Health App thar an siam ang a, hemi hmang hian nitin player leh official-te hriselna dinhmun chu enfiah a ni ang a, player, coaching staff leh anmahni hnaih tute chu kar khatah vawi hnih aṭanga vawi thum tal Covid-19 an kai leh kai loh enfiah ṭhin a ni ang. 

ISL khel tur team zawng zawng chu September-ah Goa thleng vek tura beisei an ni a, training hi October 1-10 inkara ṭan chauh tura ruahman ni mah se Goa thlen hunah inkhunghran (quarantine) phawt an ngaih dawn avangin thlen hma a ngai dawn a ni. 

Player leh coaching staff-te hi hotel-ah dah an ni ang a, gym leh swimming pool-te chu anmahni chauh hman tura tih niin mipui vantlang nen an inpawh phal a ni lo ang.