Stamford Bridge-ah Chelsea an tho thei ang em?

Carabao Cup semifinal second leg hmasa zawk chu zanin dar 1:30 hian Stamford Bridge-ah khelh a ni dawn a, Chelsea-in Middlesbrough an mikhual ang. Riverside Stadium-ah Michael Carrick-a enkawl Boro hian 1-0 in hnehna an chang a, first leg inkhel result hian zanin inkhel tur hi en a tichâkawm hle.

Semifinal hnuhnung zawk hi naktuk zanah khelh a ni dawn a, Fulham-in Liverpool an mikhual dawn. Jurgen Klopp-a hote hian 2-1 in hma an hruai mek a, amaherawhchu Craven Cottage-a khel tur an nih avangin Wembley Stadium thleng tawha indah erawh a la rem lo thung.

Chance ṭha hlah

League Cup semifinal khel team pali zingah Middlesbrough chiah hi Premier League club ni lo an ni a, Blues-in Championship club an chang hi an vannei. Mahse, first leg-ah chuan an vanneihna an hmang ṭangkai lo phawt a, Cole Palmer-a chance ṭha hlah hnem an tuar.

Chelsea hian goal shot vawi 18 zet an nei a, Man City aṭanga Blues zawmtu Palmer hian hattrick siam theihna tur chance ṭha a nei. Boro erawhin Hayden Hackney hmangin minute 37-naah an khung a, Carrick-a hoten beiseina sang tak an neih phah.

Fixtures hautak

Chelsea hi Premier League-a an khelh dan thlir chuan League Cup emaw FA Cup emaw hi nomawi an beiseina chu a ni mai a, semifinal hial an thlen tawhna Carabao Cup hi an dah pawimawh ngei a ṭul. Chutihrualin rilru kap tawk tur leh player thlan tibuai turin an hmaah fixtures hautakin a hmuak.

Mauricio Pochettino hoten hian January 26, Zirtawpni zanah FA Cup fourth round an khel lehnghal dawn a, tun season hmang ṭha zet Aston Villa an mikhual dawn. January 31, Nilainiah Liverpool hmachhawn turin Anfield an tlawh nghal dawn a, February 4, Pathianni zanah Wolves an mikhual leh dawn.

Argentine manager Poch-a tan match khat ringawt ngaihtuah a finthlak loh thei a, chutihrualin extra time khelh ngai loa minute 90 chhunga hnehna chan theih chu duhthusam a ni thung si. Hei vang tak hian Poch-a'n sa huai ser a, dinhmun ṭhat hnua player ṭha thlak chu a duh thlanna turah a ngaih theih.

Mahse maw, Wesley Fofana, Reece James, Marc Cucurella, Romeo Lavia, Christopher Nkunku, Robert Sanchez leh Lesley Ugochukwu te chu inhliam vangin chhawr theih loh vek an ni. Nicolas Jackson lah, AFCON khelin a zin chhuak mek bawk. Poch-a'n duh thlan tur a ngah lo a, a kawl hote a hman thiam a ṭul dawn a ni.

Chelsea hian League Cup nomawi hi vawi nga an chawi tawh a, semifinal thleng turin AFC Wimbledon, Brighton & Hove Albion, Blackburn Rovers leh Newcastle United te an hneh. Wembley Stadium thleng loa inelna khar chu thih hrehin an hreh ang.

Carrick 'Magic'

Michael Carrick-a'n season liam taa Middlesbrough a enkawl ṭantirh khan tla thei dinhmunah an ding a, season tawpah erawh Premier League khel tur zawnna playoff an khel pha hial. Tun season-ah Boro che ṭha tawk lo mah se League Cup semifinal hial an thleng thei a, nomawi beiseina a la nung.

English manager hian Manchester United talbuai lai tak a enkawl ṭum khan Villarreal leh Arsenal a hneh bakah Chelsea a chelh bawk. Riverside Stadium-a goal khat an neih tawh avangin Carrick-a hote tan goal chhuah loh a tawk a, mah se Boro theihna hi Chelsea player-te theihna nen a inthlauh avangin a harsa dawn.

Boro-in first leg-ah hnehna chang mah se sum hmang tam Chelsea muala khel tur an nih avangin Premier League club buk a rit zawk a, Championship club hian hnehna an chang a nih chuan Carrick-a coaching career-ah hmun pawimawh a chang ngei ang.