Zaninah India hma hun a chiang dawn

AFC Asian Cup 2023-a match hnih an khelh tawhah India an la tlawm ve ve a, vawiin tlai dar 5:00 hian an match hnuhnung ber atan Syria an hmachhawn dawn - an chak chuan last 16 luh beiseina a la awm ang a, draw emaw tlawm emaw a nih chuan Asian Cup 2023 an mangṭha nghal thei ang.

Uzbektistan laka 3-0 a an tlawm ṭumin ṭhal hliam vangin Lallianzuala Chhangte a inlan thei lo a, vawiinah erawh inlan thei tawh tura beisei a ni. AIFF Player of the Year chuan, "Pathian zarah ka dam tawh a, inlan theih ka beisei," tiin Vanglaini a hrilh.

Lunglei tlangval chuan Syria nena an inkhel tur thlirlawkin, "Last 16 lut turin chak kan mamawh a, midang result-ah kan innghat tel bawk. Mahse, hneh ngei turin theihtawp kan chhuah dawn a, chak nei loa haw kan duh lo," tiin Vanglaini a hrilh a, Syria lakah chak an tum dawn.

India tana midfielder pawimawh ni phak Lalengmawia Ralte (Apuia) pawhin, "Kan hmachhawn hmasakte ai chuan nem zawk turah ka ngai a, mahse, a awlsam dawn lo. Tlang theih dan kan la nei miau a, beiseina kan la nei ve reng a ni," tiin Vanglaini a hrilh.

Asian Cup 2023-ah hian group tina a sang pahnih bakah pathumna zinga a tiṭha zual paliin last 16 an lut dawn a, India tan chuan pathumna tiṭha zinga tel hi beiseina chu a ni - chumi tur chuan Syria an hneh ngei ngei a ngai a, Oman, Tajikistan leh Palestine zinga team pahnih tal hi an tlawm emaw khingpui an draw a ṭul bawk.

Mahse, India tan a awlsam dawn lo - Sryia hian match hmasa berah Uzbekistan chu 0-0 in an chelh thei a, match hnihnaah Australia lakah 1-0 in an vanduai. Coach Héctor Cúper hi Valencia vanglaia Champions League final vawi hnih ngawt hruai thlengtu kha a ni a, Real Betis leh Parma te pawh lo enkawl tawh niin, tawnhriat a nei ṭha hle.

Tlarhnungah Slavia Prague defender Aiham Ousou leh midfield-ah Argentine top division club Independiente Rivadavia tana khel mek Ezequiel Ham te an nei a, tlarhmaah lah Argentine club tho Belgrano tana khel Ibrahim Hesar leh Peruvian club Alianza Lima tana khel Pablo Sabbag te an inkawptir thei a, India tan a awlsam dawn lo.