Alcaraz leh Zverev an tlang

Australian Open 2024 nomawi inchuh boruak a ngaihnawm chho tial tial, nimin khan world number 1 Carlos Alcaraz leh Alexander Zverev te chuan an khingpui ve ve hnehin quarterfinal an inhlangkai - semifinal luh inchuhin an intawng zui dawn!

Margaret Court Arena-a inkhelah Zverev-a'n tlang turin vanneihna a mamawh tel. German tlangval hian darkar li leh minute ruk chhungin Cameron Norrie chu 7-5, 3-6, 6-3, 4-6, 7-6 (10-3) in a hneh hram.

Player pahnih an inkhel tawk em em a, set hnuhnung berah pawh tie break khelh a ngai. Hun pawimawhah Britian tlangval Norrie-a'n a zawna vawi thum a tihsual bakah double fault a nei a, an inkarah point li ngawt a tlak tak avangin a tho chhuak thei ta lo.

Kum 26 mi Zverev chuan, "Grand Slam a nih tawh hi chuan inkhel awlsam a awm thei lo. Cameron Norrie khan a khel ṭha hle a, ani paltlang theih chu thil lawmawm tak a ni," tiin a sawi, quarterfinal-ah match hautak dang a khel zui dawn.

Quarterfinal-a Zverev khingpui tur Alcaraz chuan harsatna a la tawk lo. Spanish tlangval hian nimin tlai khan Miomir Kecmanovic chu 6-4, 6-4, 6-0 in a hneh, chak tur hian Rod Laver Arena-ah darkar khat leh minute 49 bak hun a hmang lo.

Alcaraz chuan, "Zverev nen kan inkhel hi a hautak dawn, tun hmain US Open-ah pawh harsa takin ka lo paltlang tawh, tun ṭumah pawh hian khatiang kha ka beisei," tiin German tlangval paltlanga semifinal luh ngei a tum.

Inkhel dangah Australian Open final vawi hnih khel tawh Daniil Medvedev pawh a chak. Russian tlangval hian nimin chawhma lam khan Nuno Borges chu 6-3, 7-6 (7-4), 5-7, 6-1 a hnehin a thiam zual pariat zingah a inhlangkai ve bawk.

Seeded pathumna Medvedev chuan, "Set thumna kan khelh laiin match point ka bawhpelh a, thil kha a awlsam lo hman hle. Hnehna chang tur khan ka tlan tam a ngai takzet a ni," tiin harsa taka quarterfinal lut a nih thu a sawi.

Semifinal thleng turin Medvedev hian Hubert Hurkacz a paltlang leh a ngai dawn. Last 16 inkhel dangah Hurkacz hian wildcard hmanga inlan Arthur Cazaux chu 7-6 (8-6), 7-6 (7-3), 6-4 in a lo hneh ve thung.

Vawiin hian mipa quarterfinal khelh chhunzawm a ni dawn, champion lai leh vawi 10 teh meuh Australian Open nomawi chawi tawh Novak Djokovic chuan seeded 12-na Taylor Fritz a hmachhawn ang.

Australian Open a nih tawh chuan Djokovic hi rinkai ber a ni zel, American tlangval Fritz hian last 16-ah season hmasa finalist Stefanos Tsitsipas a hneh - Serbian tlangval paltlang tur erawh chuan thapui thawh mai bakah vanneihna a mamawh tel dawn a ni.

World number 1 Djokovic-a'n Grand Slam nomawi 24 a nei tawh a, major title lak hnem lamah amah hnaih bertu Rafael Nadal (22 titles) lakah pawh a sang fal tawh hle, a ropuina belhchhah tumin a bei mek - champion turin match thum chak a la hmabak.