Salah tel lohna Liverpool an buai lo

Goal khung khawl Mohamed Salah awm lo mah se Liverpool tan buaina a tling lo a, Reds hian Pathianni zan khan tun hnaia result nei ṭha tak Bournemouth chu khualmualah 4-0 ngawtin an sawp.

Liverpool tan Darwin Nunez chuan sawiselna tawk ṭhin mah se theihna sang tak a nei tih pholangin, goal hnih a khung a, Diogo Jota chuan goal hnih tho a khung bawk - Bournemouth-in a chhanletna tur an nei lo.

Reds-in hnehna an chan avangin Premier League table chung ber an luah chhunzawm a, anmahni hnaih bertu Manchester City aiin point ngain an sang zawk - Pep Guardiola enkawl team ai hian match khatin an khel tam thung.

Liverpool hian Nilaini zan dar 1:30-ah Fulham nen League Cup semifinal second leg an khel zui dawn a, first leg-ah 2-1 in an chak tawh - Reds inkhel hi an hmachhawn leh tur Fulham tan hmuhnawm ti taka thlir a harsa mai thei!

An ngai lo

Vanlalpianga hlaah khan, "Karizma bike te, zen leh santro te, ka tan chuan e... an ngai lo, an ngai lo" a ti em kha (h)? Liverpool pawhin a thiampuipa Salah bakah Trent Alexander-Arnold, Andrew Robertson leh Dominik Szoboszlai te hliam vanga chânin, Japan captain Wataru Endo chu Asian Cup khelin thang bo bawk mah se...anni ho hi an ngai lo, an ngai lo!

A bik takin Salah-a'n AFCON a khel dawn tih a chian khan, Reds hi Egyptian forward tel loin eng nge an an ang? tih chu zawhna langsar a ni a, mahse, he zawhna hi Liverpool hian hnehsawh takin an chhang mek a, tunah chuan a la in 'tick' vek.

Salah awm loh hnuah Reds hian Arsenal chu FA Cup fourth round aṭangin an pet chhuak a, League Cup semifinal first leg-ah Fulham an hneh a, Premier League-ah Bournemouth an sawp leh ta - champion an sawi ri ṭan a nih pawhin tuin nge dem thei ang?

Bournemouth lakah pawh Liverpool hian beisei angin bul ṭan lo mah se, second half-ah an theihna tak tak an pholang a, second half ṭan aṭanga minute linaah Nunez chuan Jota siamsak ṭha zet chu goal kil sirah mawi lutukin a khung.

A changtupa Jota & Nunez

Liverpool-in goal an khung meuh chuan an hawi kir tawh lo a, Cherries tan beisei tur a vang tawh tih chu sawi nawn a ngai lo - minute 70-naah Jota hun a inher chhuak a, Cody Gakpo siamsak a khung chu a finishing ṭhatzia pholanna a ni.

Reds-in an la duhtawk lo cheu - Jota a tui laklawh a, goal a khung aṭanga minute kuanaah a goal hnihna a khung leh a, kum 20 mi Conor Bradley siamsak ni mah se, a goal hmasa zawk ang thoin a thawkchhuak hmasatu chu Nunez a ni a, Uruguayan striker a khel ṭha takzet.

Hun pek belhah Nunez hian khung ve lehin, Joe Gomez-a siamsak chu tlu chungin a tlawh lut - tun season inelna hrang hrangah match 31 khela goal 10 khungin, assist vawi 10 a nei tawh a, tun season-ah PL player zinga goal leh assist vawi 10 ve ve nei tling hmasa ber a ni.

Goal emaw assist emaw nei lo mah se, lam hmaih thiang lo chu Alexis Mac Allister a ni - Argentine midfielder hi Liverpool tan midfield-a roreltu a ni a, a che vel hmuh a nuam a, a inringtawk a, Reds-in champion an tumna kawngah a chet ṭhat zel hi a pawimawh khawp ang.

Solanke a reh

Liverpool striker hlui Dominic Solanke-a'n tun season-ah a theihna tak tak pholangin, Premier League match 20-ah goal 12 a khung tawh a, assist vawi khat a nei bawk - PL Player of the Month ni lai a ni a, Cherries player zinga he dinhmun luah hmasa ber a ni.

Mahse, a club hlui lakah Solanke a reh a, Jurgen Klopp-a hmaah a theihna pholanna remchang nei mah se, Liverpool tlarhnung hmaah a zam ral a, captain Virgil van Dijk leh Ibrahima Konate te an khel ṭha takzet.

Kum 20 mi Bradley-a'n league-ah Reds tana a match hmasa ber a khel a, a khel ṭha. Liverpool academy chhuak defender chuan, "Kum nga ka nih aṭang khan he hun lo thleng tur hi ka nghak tawh a, ka hlim hle a ni," a ti.

Liverpool boss Jurgen Klopp chuan, "Chawlhlawk lai khan 0-0 a la nih avangin ka naute ka fuih a, ka fuih ang takin an khel chhuak a ni. Substitution kan siam dan kha infak duh mai thei a, mahse, a tira bul kan ṭantirte pawh an bul ṭan chhan a awm vek," a ti a, an ruahman anga thil a kal thu a sawi.