Azarenka hnehtu Dayana Yastremska

Dayana Yastremska-i tan Australian Open 2024 chu mumang ang mai a la ni chhunzawm. Ukraine nula hian nimin khan Victoria Azarenka hnegin quarterfinal a inhlangkai a ni.

Kum 23 mi Yastremska hian qualifying paltlangin Australian Open hi a khel phak ve chauh a ni a, mi hriat hlawh tak a ni lem lo. Mahse, Grand Slam vawi hnih champion tawh Azarenka hi 7-6 (8-6), 6-4 in a hneh a, a vawi khat nan major tournament last 16 a paltlang.

Hnehna changtu Yastremska chuan, "Tun hmain Grand Slam chu ka lo khel ve tawh ṭhin ngei mai a, mahse tun ṭum anga round sang hi ka la thlen loh bakah, player ṭha leh ropui hi ka la hneh ve ngai lem lo.

"Ka tawn ngai loh thil ka tawng chho mek a, match ka khelh hmabak pawh hmachhawn dan ka thiam ngei ka beisei," a ti. Azarenka hneh tur hian darkar hnih leh minute sarih chhung hun a hmang.

Quarterfinal-ah chuan Yastremska-i'n Linda Noskova a hmachawn leh ang, Noskova leh Elina Svitolina te an inkhel a, inkhelh laklawh laiin Svitolina hi a hnungzâng na vangin a khel chhunzawm thei ta lo.

Australian Open khelh laiah hian, hmeichhe world number 1 Iga Swiatek pawh a lo tla tawh. Hetihlai hian champion lai leh seeded pahnihna ni bawk Aryna Sabalenka leh US Open champion Coco Gauff te erawh an la dam thung.