Ranji Trophy : Mizoramin Arunachal Pradesh an ngam

Board of Control for Cricket in India (BCCI) hnuaia state hrang hrang inelna sang Ranji Trophy khelh mekah Mizoram team chuan Arunachal Pradesh chu wickewt riatin an hneh.

January 19 aṭang khan state pahnih hian Ranji Trophy hi an khel ṭan.Ṭhum vawra vannei zawk Arunachal Pradesh lamin vuak hmasak an thlang. 1st innings-ah run 265 siamin an out vek a, he innings-ah hian Mizoram guest player Mohit Jangra chuan wicket ruk lain, guest player tho KC Criappa chuan wicket thum a la bawk.

Mizoram lamin bat ve lehin 1st innings-ah run 323 siamin, run 58-in hma an hruai thei. Agni Chopra-a'n run 114 siamin Mizoram chu dinhnmun ṭhaah a dah. Tualchhung player Vikash Kumar (58 run), HM Ralte (25) leh Joseph Lalthankhuma (24) ten an thawhhlawk bawk a ni.

Arunachal Pradesh lamin 2nd innings-ah run 134 chauh siamin an out vek. Mizoram tan Mohit Jangra leh KC Criappa te chuan wicket nga ve ve an la - Mizoram tan target atan run 77 an tuk. Mizoram team lam hian harsa lutuk loin target hi wicket hnih chauh hloh chungin an um phak.

Mizoram team manager Lalzuiliana chuan, "Chakna kan chan chungchangah hian lawmthu sawina tur kan ngah hle a, kan hruaitute leh kan chhungte ṭawngṭaina rah a ni a tih loh theih loh. Pathian venhimna hnuaiah kan player-te an dam tlang a, inhliam kan awm loa kan vannei hle a ni," a ti.

Mizoram hian Janaury 26-29 chhung hian Meghalaya an tum leh dawn, chumi hnuah Hyderabad an la hmachhawn leh ang.